Xuacu García y Daniel Fernández son los veceros que mandaron rempuesta a les pallabres de la sesión anterior. Pa velo, abríi y pasái per esta portellica dixital.

La clasificación queda, a partir d'agora, de la siguiente manera:

Daniel Fernández, cuarenta y nueve puntos; Joaquín García Cuello, trenta y siete puntos; Esteban Carcedo, dieciocho puntos; Tomás Torre, selce puntos; Ramón González, quince puntos; Casio González, cinco puntos.

 

LES VIVES // LA PEDRONA // VAL MÁS PRAU ARRAÑÁU QUE MONTE TREMÁU

Aquí vos amosamos les nueves propuestes de léxicu barboliego pa los prósimos dis (hasta'l vienres)

LES VIVES // LA PEDRONA // VAL MÁS PRAU ARRAÑÁU QUE MONTE TREMÁU

 

Daniel Fernández García diz:

Hola Xulio
 
Les vives sonles críes de los pioyos.
 
La pedrona ye'l sitiu onde se ponen los muertos cuando muerren, antes de metelos nel ataúd.
 
El refrán quier dicir que val más qu'un prau te pacíu qu'un monte te llenu yerba.

 

Marta González Llaneza diz:

Hola Xulio :
Nun sé mui bien cómo va esto, pero creo que ye poner el significao:
Vives son les pulgues.
La pedrona ye la piedra onde se ponín a los muertos.
Lo de prau arañau y monte quemau nun tengo muncha idea pero creo que ye que vale mas tener el prau segau y la yerba guardá que tener que quemalo porque se pue moyar.

 

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

 

Damos la bienvenida al concursu a Marta González, vecera tradicional de la fueya barboliega y agradecémos-y la participación. Ye una pena que nun haiga entamao antes a unviar rempuestes... Nesta ocasión algama un guapu puntu, que-y val pa entrar tranquilamente na tabla clasificatoria.

L'otru veceru, Daniel Fernández, lleva tres puntos, que lu afiancen, si cabe, na tiesta de la llista.

 

vives, les: Son los güevos de los pioyos, que s'alcuentren apegaos a los pelos de la persona que los tien.

pedrona, la: La mesa de piedra que se topa na caseta de los cementerios, y onde se coloca'l cadavre que va a ser sometíu a l'autopsia.

val más prau arrañáu que monte tremáu: Ye de más valor un prau anque tea mui pacíu (arrañáu) qu'un cachu de monte por mui llenu de pastu (tremáu) que tea.