Marta González, Daniel Fernández y Xuacu García son los veceros que mandaron rempuesta a les pallabres de la sesión anterior. Si vos peta vello, abríi y pasái per esta portellica dixital.

La clasificación queda, a partir d'agora, de la siguiente manera:

Daniel Fernández, cincuenta y cuatro puntos; Joaquín García Cuello, cuarenta puntos; Esteban Carcedo, dieciocho puntos; Tomás Torre, selce puntos; Ramón González, quince puntos; Casio González, cinco puntos; Marta González Llaneza, tres puntos.

 

LA RABERA // LA TIMONA // MIENTRES CIBIELLOS TUERCEN, GÜES FUELGUEN

Aquí vos amosamos, per riba y per baxo d'esta llínia, les nueves propuestes de léxicu barboliego pa los prósimos dis.

LA RABERA // LA TIMONA // MIENTRES CIBIELLOS TUERCEN, GÜES FUELGUEN

 

Marta González Llaneza dixo:

Hola: Paezme que sabía les respuestes de les pallabres anteriores a éstes, pero nun tuvi tiempu contestar. Voi arriesgame con éstes:
La rabera y la timona creo que son partes del llabiegu.
Creo que los cibiellos son tamién una parte del aráu que s'engancha al xugu. Nun entiendo mui bien la frase pero creo que quier decir que si rompen los cibiellos los gües nun tienen ná que trabayar y fuelguen.

Daniel Fernández García dixo:

Hola Xulio:
 
La rabera ye una pieza del aráu na que se ponen les manes pa dirixilu.
 
La timona ye un palu gordu y llargu pel que se tira del aráu, ye'l so timón.
 
El refrán quier dicir que si rompen los cibiellos del aráu, tárdase muncho en facer otros y los gües tan ensin tarea tou esi tiempu.

 

Xuacu García Cuello dixo:

Hola Xulio:
Esta semana va d'arar les pallabres
La Rabera: Ye la parte de la llaviega per onde se coge p'arar.
La Timona: Ye la parte de la llaviega que va recta y que sale de la timona onde s'amarren les vaques pa que tiren per ella.
Mientres cibiellos tuercen, Gües fuelgen: Los cibiellos ye con lo que s'amarra la llaviega al xugu de los gües, y como lo facíen d'ablanar restorcío, cuando rompía, los gües descansaben.   
                                                                                 Un saludu.
 

Xana Llaneza Prieto dixo:

mientres cibiellos tuercen, significa que cuando taben arando los gües y rompía'l cibiellu, teníen que dir a facer utru rápido; y gües füelgen, ye que mientres taben faciendo'l cibiellu los gües non trabayaben.
 
La rabera y la timona son unes partes del llabiegu.
La rabera ye la parte per onde se garra'l llabiegu, y la timona ye' l palu llargu per onde van los gües.
Explicómelo mio güelu.
  
Xana Llaneza Prieto

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

 

Bono, pues tamos contentos de poder decir que nesta sesión, tuviemos una perbona collecha d'aciertos. Los cuatro participantes algamen el total de puntos posibles: tres. Felicidaes a tous ellos y una especial bienvenida a Xana, la participante más xoven del concursu.

rabera, la: Ye como si fuera'l rabu de la llabiega (de hi'l nome rabera < rabu) . La persona que ta arando garra la rabera coles manes pa dirixir el trabayu.

timona, la: Palu llargu de la llabiega que s'amarra al xugu pal llabor d'arar o llabrar.

mientres cibiellos tuercen, gües fuelguen: los cibiellos servíen p'amarrar la timona al xugu. Si nun hai cibiellos (porque se rompieran mientres s'araba...), paez evidente que durante'l tiempu en que se faen (tuercen), los gües tean ensin trabayar, folgando.