pa. preposición cola que se denota el fin o términu a u s’empobina una aición. El rapaz estudia pa maestro./ 2. Emplégase tamién determinando l’usu que convién o pue dase a una cosa. Isi trapu ye bunu pa bayeta./ 3. Significa la causa de daqué, equivaliendo a “por qué”. ¿Pa qué vinisti?.
pá. m. Apócope de «papa» o «padre». ¿Ya vieno mio pá, ne?. ¡Pá!, ¡Ven a ver esto!.
pacencia. n. Capacidá de padecer o soportar daqué ensin alteriase. Colos guajes hai que tener pacencia./ 2. Capacidá pa facer coses pesaes o minucioses. Yo eso nun lo sé facer… pacencia tengo poco…/ 3. Sufrencia, facultá de saber esperar cuando se nagua por daqué.
Cada vegada se siente más, na fala, la forma “paciencia”.
pación. n. Yerba verde, segao o ensin segar. Voi char isti brazáu de pación a la vaca.
Hai un refrán que diz:
“La pita pel picu pon
y la vaca pela pación.”
onde s’allaben les propiedaes alimenticies que la pación tien pal ganao, en comparanza cola yerba curao.
pacional. m. Sitiu onde la pación ye abundante y crecío. ¡Vaya pacional qu’hai aquí!
pala. f. Preséu compuestu d’una tabla, xeneralmente de metal, rectangular o arreondiá, y un mangu gurdu, cillíndricu y más o menos llargu. Hai qu’echar la tierra esto cola pala en carretillo.
pala dientes. f. Preséu formáu por dellos filos de fierro paralelos que salen d’otru perpedicular a ellos y con una especie de tubu onde se pon l’estremu d’un mangu. Úsase pal cuchu.
pala rasera. f. Pala.
palá. f. Cantidá que lleva una pala llena. Echa unes palaes aquí.
paleta. f. Pala pequeña, como, por exemplu, la que s’usa pa char carbón a la cocina.
paletá. f. Cantidá que lleva una paleta. Écha-y unes paletaes de carbón a la cocina, que nun muerra.
palillu. m. Instrumentu pequeñu de maera, rematáu en punta, que val pa escarbar los dientes sacando los restos de comida qu’hai ente ellos./ 2. Xuegu infantil, consistente en tirar un palu d’un llau pa utru… De guajes xugábemos en Rezaleru al palillu.
Paez castellanismu pol sufixu, que debiera esperase “-iellu”.
palote. m. Preséu col que s’ara la tierra a mano. Ta formáu por un mangu y por una llámina de fierro rectangular. Esta tira ararémosla a palote.
palotiar. tr. Arar la tierra col palote. Tuviemos palotiando, palotiando… ¡palotiémoslo ente to pa y yo!.
palumbu. m. Ave domesticá, que provieno del palumbu montés. Estos palombos nun son míos.
Nesa voz, el masculín ye’l nome de la especie, usándose la forma femenina «palomba» namái que pa designar la fema.
palumbu turcaz. m. Palumbu montés que vive en llibertá, ensin domesticar. Vese pelos montes del valle en bandaes. En castellano, “paloma torcaz” (columba palumbus). Esos aquí llamámos-yos palombos turcaces… los qu’hai pequí son franciscanos (Alvaro Suárez, 7-95).
pámeque. Contraición de la espresión “paezme que”, equivalente a “al pacer”, “polo visto”… Emplégase muncho na fala llariego.
pámique. Lo mesmo que «pámeque», expresión equivalente a «polo visto» «al paecer».
panaera. f. Lo mesmo que «pisalamera», páxaru. Les panaeres son les pisalameres.
panera. f. Graneru de maera, aislláu del suelu y sosteníu por seis pegollos. Diferénciase del horro en qu’ésti tien cuatro pegollos y ye más pequeñu.
paniega. f. Yerba de les praeres con fueyes allargaes y un tallu daqué duru y llargu, con delles inflorescencies.
panoya. f. Conxuntu de granos de maíz apegaos a un tarucu. Iti maíz tien unes panoyes mui guapes.
pañolín. m. Xuegu infantil nel que componentes de dos equipos intenten garrar un pañuelu, que cuelga de la mano d’un árbitru, y lleválu hasta la zona del so equipu ensin que lu agarre antes el contrincante..
papa. m. Forma familiar de «padre». ¡Papa, ven a ayudame!
Ye pallabra llana.
papa rosolla. f. Fantasma imaxinariu pa meter mieu a los guajes pequeños. ¡Ahí vien la papa rosolla!.
papáu. m. Na espresión «traer un papáu», que significa tar mui enfadáu por alguna ofensa recibía, aunque ensin esteriorizalo mediante pallabres.
papel. n. Sustancia en forma de fueyes delgaes, fecho con pasta obtenío de fibres vexetales, trapos, otros papeles, etc. Escribimos nun fueya de papel blanco./ 2. m. Periódicu diariu. ¿Qué noticies trai hoi el papel?.
papiciega. f. Una clase de pera y de peral. Había perales d’esos de papiciega, d’esos d’invierno de peres tardiis (Felguera Riba, Blimea, 8-95).
Esta voz, recoyía en Blimea, en Santa Bárbola nun la conocen. A la pera que designa, llámen-y, aquí, “enverniza”, pero dellos informantes entienden que-y llamen “papiciega” notros llaos porque al comela «empapiza» de lo dura que ye. (Mino Suárez y Clemente Llaneza, agos.´96).
papón. m. Páxaru de papu coloráu que fai el nial en baxo y que si-y quites un güevu nun refuga. Pel inviernu pue entrar nes cases o cuadres, dicen que buscando arañes ya otros inseutos. Pue ser el que se conoz en castellanu como “petirrojo”. Tuviemos esgüeverando un nial de papón: tolos dís-y quitábemos un güevu, y el papón seguía poniendo, hasta qu’ un día quedó esgüeveráu, muertu en nial.
papu. m. Abultamientu carnosu de debaxo de la barba. El que nun tien papu nun ye guapu (antiguu refrán).
papu la pierna. m. Músculu de la parte inferior de la pierna. Manquéme nel papu la pierna.
papuxeru, -a, -o. ax. Que ta empapuxáu, que tien papu, que ta “gordito” de la cara.
paraxismu. m. Mentira, llevantu. Eso que dixisti ye un paraxismu.
Na «Antoloxía Poética»,(Uviéu 1996, A.LL.A.) de Carlos García-Ciaño (poeta del s.XIX nacíu en Samartín del Rei Aurelio), nes pp.14 y 109 apaez esta voz con un sen que ye ensin dubia el mesmu que tien agora en Santa Bárbola:
El tíu Xulián
el molineru: Rapazos
una cosadiella va.
atención.
– Dígala clara.
– Sin paraxismos, pa day
ena bidaya» (p.14)
– ¿Está malu?
– ¡Malu! ¡Vaya una currencia!
¡Fíu del alma! D’estalo,
¡iba separame d’elli!
Tú non les pienses.
– Me caso…
siempre tais con paraxismos
les muyeres. (p. 109)
pardín. m. Páxaru pequeñu que vive pel monte (zona alta) de la parroquia, de color pardu como indica’l so nome. Pue ser el que se conoz en castellanu como «tarabilla común». La hembra de la chana canta que lo ambura… canta casi como un pardín… el pardín… veslos tú ahí pel monte casi siempre» (Alvaro Suárez, 7-95).
pardón. m. Ave de rapiña, de color pardu; ye de les de mayor tamañu que se ven pela collación. Pue ser el que se conoz en castellanu col nome d’“águila ratonera”. En mio casa tenemos un pardón disecáu. Tamién se conoz, nos pueblos de La Robellá y de La Cerezal, colos nomes de «guzapu”, “guzapón» y «llimpiamayaes».
parexa. f. Conxuntu de dos persones, animales o coses que se complementen. Tienes una bona parexa de vaques pa oncer. Una parexa de novios.
parlaembaldre. m. y f. Que fala con llixereza y ensin sostancia. Son unos parlaembaldre, nun-yos faigas casu.
parloteru, -a, -o. ax. Que parla muncho y con gracia. Ye mui parloteru, gústa-y hablar con la xente.
Esta voz nun tien sen peyorativu.
parpayuela. f. Perdiz, ave. La parpayuela llamáben-ylo a la perdiz porque canta d’esa manera… la perdiz canta «sparpayar parpayar parpayar» (Alvaro Suárez). parra. f. Conxuntu de blinques que salen d’una mesma raíz. Na sebe’l prau hai unes parres d’ablanar.
parrar. intr. Char blinques les plantes. Los artos, si los cortes, parren más (Clemente Llaneza, xunetu 96).
parreru. m. Parra./ 2. Sitiu onde hai munches parres.
pasar el agua. Ritual pa desagüeyar a una persona. Pa pasar el agua había que tener, ente otres coses, un trapu de ropa del agüeyáu y unos cachos de cuernu.
pasera. f. Pasu estrenchu ente finques pel que nun ye a pasar el ganao.
Hai un cantar llariegu, de mediaos del presente sieglu, que decía:
Baxasti hasta la pasera
a sisionar con Agosto
por ver al Nuedu pasar
¿o crees que nun te conozo?
pastia. n. Masa de fariña y agua. Pa facer pan, primero facíase la pastia y dempués ya se chaba nel llar.
pastiu. m. y n. Cachu masa de fariña y agua que se chaba nel llar pa facer la boroña. Envolvín el pastiu en berces y mangábenlo allí en baxo, en llar… (Julia Fernández).
pataca. f. y n. Planta herbácea anual de la familia de les solanácees, orixinaria d’América. En castellanu, “patata”. / 2. El tubérculu de la mesma, comestible. Les pataques húngares son azulaes. La pataca cocío ye mui sano.
Na fala actual, úsase, casi esclusivamente, la forma “patata”, igual qu’en castellanu.
patacal. m. Sitiu plantáu de pataques. La estaya de riba de la llosa tenémosla de patacal.
patacu. m. Pataca pequeñina. Los patacos valen pa arregalos con carne. Esta voz tien vixencia plena na fala de güei, al contrario de lo qu’asocede con la femenina “pataca”.
patallú. n. Yerba qu’enraiza muncho y encampez les güertes que se dexaren pa prau. El patallú prospera mui bien, ye ramúo y esparde pa los llaos. Hai munchu patallú (Julia Fernández).
pataqueru, -a, -o. ax. Nomatu que reciben los de Santa Bárbola por parte de los del vecín valle llangreanu de Les Cubes.
patochá. f. Pallabra o frase que nun vien a cuentu y cai mal. Decía a lo mejor cualquier patochá y mio madre enfadábase muncho.
paxarín de glayu. m. Pinzón, páxaru. Y el pinzón llamámos-y paxarín de glayu, que ye imitáu na pluma al glayu (Alvaro Suárez, 7-95).
paxarón del agua. m. Páxaru grande, qu’anda pel monte y col so cantu créese que llama l’agua. Tamién se-y llama “ceriguillazu». Pue ser el que se conoz en castellanu como «pito real»(picus viridis). Los paxarones del agua crien pequí pelos furacos de les castañales (Alvaro Suárez, 7-95).
pedióricu. m. Vid. «periódicu».
pegarata. f. Dulce que regalen los padrinos a los sos afiyaos pela selmana santa, mientres tan solteros. Ya comí la pegarata./ 2. Cualquier otru regalu que sustituya al dulce col mesmu fin. Isti añu la pegarata fueron perres.
pegollera. f. Piedra que se llanta enriba del pegollu del horro.
pegullu. m. Ca ún de los pies qu’enconten l’horro o la panera. Los pegollos hailos de maera y de piedra.
pelar. tr. Quitar el pelleyu de les frutes o la corteza de los árboles. Hai que pelar estes castañes./ 2. Cortar les flores de les plantes o les caxines de les llegumbres. Tuviemos pelando manzanilla pel mote./ 3. intr. Tirar el pelo los animales. El putru ta pelando.
pelase. prnl. Naguar por daqué. ¡Esa… poles visites, se pela!
pelaúres. f. pl. La piel de frutes y tubérculos, una vez quitao. Les pelaúres chábemosles a los gochos.
pelgón. m. Sitiu que nun tien pasu transitable polo arrimáu que ye, arrimadiellu. Encima la fuente del Rezaleru hai un pelgón.
peligrusu, -osa, -oso. ax. Que tien peligru. Isi camín ye peligrusu.
pelmaza. f. Llabor pesáu, que lleva muncha xera. ¡Esto ye una pelmaza de lo mayor!.
pelmazu, -a, -o. ax. Dizse de quien ye pesáu, repunante. Isti home ye un pelmazu d’agárrate.
pelo. n. Conxuntu de los filamentos cilíndricos que crecen na piel de los mamíferos./ 2. Lo que cubre la cabeza de los humanos. Isti rapacín tien el pelo roxo. pelu. m. Ca un de los filamentos córneos que crecen na piel de los mamíferos. Salióme un pelu negru na nariz. Ente los falantes más xóvenes, la forma en «-u» invade daqué’l campu de la qu’acaba n’ «-o» («Voi dir a cortá’l pelu»).
pella. f. Montón altu y compactu de yerba que va quedando na tená a medía que se va esmesado lo otro.
peñar. tr. Desenredar o iguar el pelo. Úsase muncho comu reflesivu. Teo que me peñar; hai que peñase.
Ya nun s’emplega na fala de güei. Dixéronlo los más vieyos fasta los años cincuenta o sesenta del presente sieglu. Agora ye la forma castellana “peinar” la que furrula.
peñazu. m. Golpe que se da a alguién tirándo-y una piedra./ 2. El mesmu llanzamientu anque nun toque al destinatariu. Llancé-yos unos peñazos a los burros y marcharon carba arriba.
peñe. m. Utensiliu con dientes mui xuntos que val pa peñar o peñase. ¿Ónde tará’l mio peñe?. Esta voz, dende los años sesenta del presente sieglu, fue sustituía dafechu pola castellana “peine”.
peñera. f. Especie cribu pequeñu y de buracos perfinos col que separa’l salvao de la fariña.
Hai un refrán llariegu que diz:
Peñerina nueva bien peñera,
y dempués, de vieya, enceliega.
refrán que fala de lo bien que marchen, en primeres, les rellaciones humanes d’amistá o de pareya, empeorando dempués a medía que va pasando’l tiempu.
peñerar. tr. Separar cola peñera el salvao del restu la fariña. La fariña aquello yá ta peñerao.
peñerín. m. Ave de rapiña, que debe’l so ñome a que se mantién nel aire, ensin desplazase, xeringando les ales comu si tuviere peñerando. Paez que ye el castellanu “cernícalo”. ¡Mia’l peñerín cómo peñera enriba’l Prau Cuetu!, ¿veslu?.
peorreru, -a, -o. ax. Que tira munchos peos o que los tira con frecuencia. Aquí paez qu’hai xente peorrero…
per-. Prefixu que se pon a los axetivos, alverbios y verbos pa indicar grau másimu. Isi nun ye malu, ye permalu (Clemente Llaneza). ¡Mira que lo percosí, y yá me rompió otra vez!
Isti prefixu agora emplégase perpoco y sólo lo faen, si pinta, los más vieyos. Fo normal, ensin embargu, fasta les primeres décades del presente sieglu.
perceguera. f. Molestia causada na piel por dalguna cosa que pica. Tengo grana pela espalda y dame perceguera. Debo tener un pelu pel piscuezu porque dame perceguera./ 2. Malestar por dalguna cosa que se ve y nun gusta. Dame perceguera ver isi guaje colos pantalones tan puercos.
perendenga. f. Dos cereces xuníes pel rabu, que ponen los neños na oreya imitando pendientes. ¡Vaya perendenga que traes!. ¡Y ésta ponxo dos perendengues!.
perezusu,-osa, -oso. ax. Que tien pereza, que-y muerde facer les coses. El neñu ye más perezusu pa llevantase que la neña.
pericón. n. Planta melecinosa, bona contra los dolores de barriga. Pue vese crecer al pie les carreteres. El pericón vale pa la barriga… hailo pehí, pe al pie la carretera, per eses costaneres (Alvaro Suárez ,7-95). periódicu. m. Publicación periódica diaria. ¿Qué mentires trai hoi el periódicu?
perro, -a. m. y f. Mamíferu domésticu de la familia de los cánidos. Isti perro ye de raza llubu.
perro, -a, -o. ax. Permalu, desgraciáu. ¡Vaya perro que yes!
pértiga. f. Vara llarga que s’usaba pa demer les castañales. Pa dir a demer hai que llevar la pértiga.
Hai una cosadiella llariega, que tien de solución la pértiga y que diz asina: Coge nel puñu y nun coge nel horro.
pescao. n. Conxuntu de pexes que tan pescaos. El pescao que mos trai el pescaeru ye fresco.
petrina. f. Correa con hebilla pa suxetar pela cintura los pantalones. Había un xuegu que se llamaba «a esconder la petrina.
peu. m. Ventosidá que sal pel anu.
piáu, -á, -ao. ax. Dizse de la ropa a lo que-y salen manches por culpa la humedá. Esta chaqueta, per esta parte, tienlo piao.
picalina. f. Picota, parte más alta. Nun subas a la picalina de la figal, que pue romper.
picar. tr. Cavar con el picu. Tuviemos picando, tola tarde, la cuneta./ 2. Comer pinchos o pequeñes cantidaes de comida diverso antes de la comida principal. Piqué unes aceitunes y quitóseme la fame./ 3. intr. Golpear a la puerte pa llamar. Paez que picaron, vete a ver quién ye.
piconá. f. Golpe que se da col picu cuando se ta picando. Voi dar unes piconaes aquí pa quitar esti sucu.
piconazu. m. Piconá, golpe dau col picu-ferramienta./ 2. Golpe que da un ave col picu. ¡Vaya piconazu que me metió’l gallu!.
picota. f. Parte cimera de daqué, especialmente de los árboles. Pa coyer más cereces hai que subir hasta la picota.
picotina. f. Parte más alta d’un árbol. Nun te subas a la picotina la cerezal, que pues caer.
picu torneru. m. Páxaru llariegu que fai buracos pelos árboles, onde llanta’l nial. El picu torneru ye apaecío al cabezu negru… ye piquiñín… ye aprosimáu a la cabeza negra. Tien la cabeza d’otra forma que l’esguila carbayos, tien un pintín negru así y el picu mui llargu (Alvaro Suárez). Pue ser una especie de lo qu’en castellano se nomina “pájaro carpintero”, quiciás el «trepador azul» (sitta europaea) según la obra ornitológica local de Frechilla García “La observación de las aves en el valle de S. Martín del Rey Aurelio”.
picu tuertu. m. Páxaru del valle, de picu torcíu como’l so nome indica. El picu tuertu… criaba ahí pelos Praos Cuscaos, ahora óigolos poco, tien el picu así, lo de baxo va pallí y lo de riba paquí, y dicen qu’afuraca les nueces cola lengua… ye de grande poco menos qu’un malvís y de la color del malvís pero más oscuru (Alvaro Suárez). Tal vegada seya’l conocíu en castellán como «pito negro» (dryocopus martius).
piedruca. f. Clase de cereces, pequeñes y ruines, con muncha pebía o “piedra”. Estes cereces son de piedruca. Úsase muncho en plural. Les piedruques pa les muyeruques, yera frase que se dicía en broma refiriéndose a esta clase de cereces.
pielgu. m. Persona despreciable poles males aiciones que tien. Isi ta fechu un pielgu.
pigaciu. m. Periodu curtiu de siesta. Tuvi chando un pigaciu aquí encontáu na mesa.
pigarro. m. Tratante, de poca monta, de ganao. Esos nun son tratantes, son pigarros.
pila. f. Aparatu que produz enerxía elléctrico ensin intervención d’enerxía mecánico. Al arradio gastáronse-y les piles./ 2. Montón de coses. Hai que facer aquí una pila con esos ladrillos./ 3. Gran cantidá de daqué. ¡Vaya pila mosques que trai esa vaca!
pindolina, en. l. alv. Ente dos persones, garrando una de cada estremu, coles manes. Vamos a llevar el sabanáu en pindolina.
pinganiella. f. Piedra que se pon nes fontes pa que l’agua pingue y se puea garrar o beber con comodidá. Garra l’agua de la piganiella.
pingar. intr. Caer un llíquidu verticalmente. Vaya cómo pinguen los bistechos./ Úsase tamién como transitivu: La vaca píngalo (refiriéndose a la lleche, que pinga de los tetos). Pinga un poco coñá nel café, a ver cómo sabe.
pingón. m. Parte d’un ríu o regueru, con desnivel vertical, per onde cai l’agua pingando. Nel Puzu la Olla, tirábemosmos dende’l pingón cuando mos bañábemos.
pingu. m. Poca cantidá de dalgún llíquidu. – ¿Quies lleche?. – Échame un pinguín aquí.
pinzón. m. Páxaru, conocíu tamién como «paxarín de glayu» pol paecíu na pluma. En castellanu, tamién “pinzón” (fringilla coelebs). La pluma del pinzón ye igual qu’el glayu» (Alvaro Suárez, 7-’95).
piñu. m. Conxuntu de frutos que surden del mesmu núcleu. Traigo unos piños de cereces.
pio campo. m. Xuegu infantil, onde los componentes de dos equipos cuerren per un campu rectangular intentando garrar al adversariu, teniendo ca equipu la madre nun de los dos llaos más curtios. Vamos xugar al pio campo.
Paez qu’el nome del xuegu vien de la espresión “pido campo”.
pioyina. f. Páxaru de pequeñu tamañu. Paez que ye’l mesmu qu’el que se conoz en castellano como “mosquitero” (phylloscopus collybita). La pioyina ye más clara y amarilla que la cerrica, la cerrica ye franciscanina (Alvaro Suárez, 7-95).
pisalamera. f. Especie de páxaru, de color buxu, cabeza negra y rabu llargu, que se ve muncho pelos praos al pie’l focicu les vaques que pacen. Pámeque fai el nial pente les teyes de los horros. Paez que ye la que se llama en castellán “lavandera blanca” (motacilla alba). Les pisalameres salten muncho per delantre les vaques.
pisalamera de río. f. Páxaru, mui paecíu a la pisalamera anque de color y hábitat distintos. Paez que ye la qu’en castellán se conoz como “lavandera cascadeña» (motacilla cinerea). Vive pel río. Aquí siempre-y llamé pisalamera, lo que hai ye de dos clases, una la de río ye amarillina y más delgá, y la dequí tien la cabeza negra y ye más cuerpu, ésa anda perriba los horros siempre (Alvaro Suárez, 7-95).
pistaña. f. Ca ún de los pelos que ñacen nos párpagos./ 2. Borde d’una tela que se dexa pa la coseúra.
pita. f. Fema del gallu. Tengo seis pites que ponen.
pitu. m. Cría de les aves. Sé un nial de torda con pitos./ 2. Cigarru pequeñu. Vamos char un pitu.
planta (de) la cosecha. f. Planta herbácea, con tallu gurdu del que sale una panoya con graninos de fechures diferentes, semeyando: unos maíz, otros trigo, otros pataca, y lo de per riba del too, la yerba. Según l’abundancia de cada clase de granu asina será la respeutiva cosecha. Les plantes de la cosecha vense pela primavera. Echa un guíu fuerte y echa per dientro como una panoyina, tien unes fueyones anches que van acopaes p’arriba (Julia Fernández).
planta la culiebra. f. Recimos de culiebra, planta esguilaora de flores en piñu vertical, allargaes y goloroses; vese nos sitios soleyeros. Tien de frutu unes bolines coloroaes axuntaes en forma recimu.
Pa nomala, emplégase muncho más la espresión «recimos de culiebra«.
planta les siete venes. f. Yerba de les praeres, con fueyes grandes de siete nervios, y un guíu acabáu n’espiga.
platu. m. Vasixa baxa y reonda con una concavidá en medio; emplégase na mesa pa servir nella la comía. Hai que pone los platos que vamos comer.
pocera. f. Poza que se fai en baxopa plantar un poste o un arbolín. Cuando trexeron la lluz nos años trenta los palos y les poceres tenimos que lo poner los vecinos (Daniel Iglesias).
podrella. f. Cadena cola que s’amarra la grae al xugu. Podía ser de cibielles o de fierro.
podrén. n. Gran cantidá de coses podres, podrizu. Isti añu hai muncho podrén de pataques.
podrizu. n. Gran cantidá de coses podres, podrén. La fruta ta too fecho un podrizu.
polgar. m. Deu gurdu de la mano. Pel polgar, tienlo hinchao.
pollín. m. Burro, mamíferu domésticu.
poner. tr. Posar, colocar. Eso pónxolo güelito pa que nun cayera (Benjamina González, xunetu 96). Estes puertes pónxomeles el to hermanu./ 2. Escribir. Pon ahí les señes./ 3. Cagar el güevu les aves. Per San Antón la pita pon (refrán)./ 4. Decir. ¿Qué pon isi cartel, ho?. El to hermanu poníase que tú nun dibes a venir. Conxugación, pret. indef.: punxi, punxisti, ponxo-punxo, punxemos, punxestes, punxeron.
ponese de gracia. Entamar dalgún llabor con ánimu y ganes. Pa la yerba hai que se poner de gracia.
pontón. m. Pieza resistente que se coloca ente les vigues d’un pisu.
ponxa. n. Restos formaos pola espeya y los filos de la espiga de la erga. La ponxa comínlo los animales, o, si no, valdría pa mullir (Julia Fernández).
porniá. f. Cagá grande d’escrementu humano, especialmente si nun ye de cagayones.
porquería. n. Suciedá, basura, burrayu. Traes contigo muncha porquería. La porquería eso hai que lo tirar.
porreteru, -a, -o. ax. Vaina, que fai males aiciones. Úsase muncho aplicao a los rapacinos, en sen cariñosu. ¡Porreterina, que yes una porretera, nun quies más que cuello!
portalá. f. Portal, tantu d’una casa comu d’una cuadra. ¿Pa qué ye isi teléfono que tenéis na portalá?.
portiar. tr. Llevar d’un sitiu pa otru. Vete portiando estes pieces pa baxo.
porticu. m. Pequeña puerte que fai de contraventana. Hai que cerrar los porticos pa que nun entre ná lluz.
portiella. f. Puerte d’una finca. Ties que t’acordar de cerrar les portielles.
portiellu. m. Portiella pequeña. Isti portiellu ta rutu, hai que facer utru.
portilleres. f. pl. Pieces verticales que van a la cabecera y a los pies de la cama.
poste. m. Maeru, de más consistencia qu’el baral o el bárganu, que se llanta verticalmente nos cierres de les finques o nes portielles. Estos postes yá tan podres.
posar. intr. Descansar. Hoi nun te dejen posar, ¿onde te manden dir ahora?./ 2. tr. Soltar la carga que se trai a cuestes. Posa’l cestu na paré un poco./ 3. Quitar la ropa o’l calzao que se trai puesto. Posa los calcetos y pon estos otros.
poza. f. Fuyu que se fai en terreno con diversos fines, como enterrar daqué o plantar postes. Pa enterra’ la vaca fexemos una poza no fondero’l prau./ 2. Parte más fonda del puzu d’un río, onde más cubre. Si te bañes nun te metas ena poza.
praera. n. Les distintes especies de yerbes que formen un prau. Esti cachu tierra de quí téngolo de praera y lo otro sémblolo./ 2. f. Prau. Tengo una praerina mui guapa al pie de casa.
prau. m. Terreno cerrao u crez la yerba pa alimentar el ganao. Cerrando esti cachu monte pue facese aquí un prau mui guapu.
prencipiu. m. Entamu, comienzu, escomencipiaúra. En prencipiu somos amigos, si, si… Ca vez s’usa más la forma “principiu», coincidente cola castellana.
presa. f. Canal pequeñu, per onde cuerre l’agua. L’agua de la fuente va per una presa pel prau alantre pa regar./ 2. Canal que lleva l’agua al molín.
preselbe. m. Parte de la cuadra, con fechura de caxón allargáu, onde s’amarren y se-yos echa la comida a los animales. Hai que llimpiar el preselbe que tien muncho estarabazu
preséu. m. Estrumentu propiu del trabayu del campu. Usáse muncho en plural. Tenemos que mos acordar de llevar los preseos pal Prau Matías.
prevesura. f. Aición mala propia d’un guaje. ¡Nun faigas prevesures, que te zurro!
priesa. n. Necesidá o deseu de facer daqué con urxencia. Esta nun tien priesa.
primeru, -a, -o. ax. Qu’ocupa’l númberu 1 nuna rellación ordenada. Allí taba la primer mina (Alvaro Suárez, 7-95).
Hai apócope de la forma femenina antepuesta.
probar. tr. Tomar un alimentu por primera vegada. Si nun pruebes la sopa nun pues dicir que ta soso./ 2. intr. Dar producción un cultivu. Les pataques isti añu probaron bien.
probe. ax. Que nun tien lo necesario pa vivir./ 2. Que da pena, qu’induz a compasión. ¡Probe guaje! ¡tous-y peguen!./ 3. com. Persona que va pidiendo llimosna. Vieno un probe a pedir y di-y cinco duros. El «probe los martes» yera un personaxe popular en Perabeles na década los cincuenta; pasaba pidiendo pel pueblu un día a la selmana, y siempre esi día yera un martes.
probín, -ina, -ino. ax. Que da llástima, pena o comunica ternura. ¡Probina, vaya cómo duerme!./ 2. Inxenuu, nocente.
Ye deriváu diminutivu de “probe”.
prometer. tr. Obligase a facer, decir o dar dalguna cosa. Prometístime que me comprarís una bici si aprobaba./ 2. Paecer, aparentar. Esi llumbu del prau promete ser d’una ribaya.
pronte. m. Reaición repentina, xeneralmente de disgustu o enfadu. To padre tien mal pronte.
prubín,-ina, -ino. ax. Lo mesmo que «probín». Isti ye un prubín, tous faen burla d’él.
puentero. alv. Del todo, enteramente. Eso ta atropao puentero; ta acabao puentero; ya quedó puentero; isi ta chuchu puentero.
Yá nun s’emplega na fala actual. Usóse fasta mediaos del presente sieglu.
puercu, -a, -o. ax. Que tien porquería o manches. Anduvisti pente’l barro y traes los zapatos puercos./ 2. Que produz manches, qu’empuerca con facilidá. El carbón ye mui puerco.
puerta. f. Puerte.
puerte. f. Vanu de forma regular, abiertu en paré, sebe, etc. pa poder entrar y salir per él. Nesta paré hai que dexar una puerte./ 2. Armazón de maera, fierro o otra materia que se coloca pa impedir la entrá o salía. Hai que trancar eses puertes.
Esta voz ye ún de los perpocos casos, que se dan na fala del valle, de femenín acabáu n’ «-e».
pulgar. tr. Pelar, quitar la piel a pataques y fruta. Esta manzana pulguétela yo.
Les voces «pulgar» (verbu) y «polgar» (deu gurdu) valen comu exemplu de la oposición fonolóxica de «o» y «u» en posición átona media.
pulgu. m. Corteyu, cachu de piel de frutes y pataques. Úsase muncho en plural: Los pulgos échense a los animales.
pumar. m. Manzanal. Tengo aquí unos pumares cargaísimos (Genta Fernández, 8-96).
Ye voz poco emplegá nel valle, predominando ñidiamente «manzanal».
púmbala. Interxeción emplegada colos neños pequeños pa espresar que dalgo cayó.
punta. f. Pieza metálica llarga y delgada, que vale pa clavar. Hai puntes de trillar, d’empontonar…/ 2. Muérganu sesual esterior masculín.
puñar. tr. Dar golpes colos cuernos el güe, la vaca o otru animal. Isi xatu yá puña.
puñáu. m. Cantidá que se pue garrar con un puñu. Toma un puñáu d’ablanes.
puñetazu. m. Golpe dau col puñu. Dio un puñetazu enriba la mesa.
puñeteru, -a, -o. ax. Que se porta mal. ¡Vaya puñetera que yes!.
puñón, -ona, -ono. ax. Que puña con facilidá. Esa vaca ye puñona. Esi ganao ye puñono.
puñu. m. Mano cerrá. ¡Abri’l puñu a ver qué tienes!/ 2. Parte de la manga de la camisa cercana al puñu. Los puños d’esta camisa tan puercos.
puquiñín. alv. que denota «perpoca cantidá». Taba un puquiñín soso.
Ye un diminutivu, doblemente sufifáu, de “poco”. Hai cierre nun grau de la velar en posición átona.
puramente. alv. equivalente a «precisamente». ¿Vas ponete en medio’l camín puramente? (Julia Fernández, avi.’96).
purrela. n. Conxuntu de fruta ruino, de perpoca calidá o tamañu. Semblaba una seruya grande y sacaba purrela.
putru, -otra. m. y f. Cría de la yegua.
puxarra. n. Bebida ruino, de perpoca calidá. La sidra esto ye puxarra.
puyu. m. Pequeña ellevación consistente xeneralmente nuna piedra o nun truncu, que se solía tener a la entrá de les cases, usada pa colocar coses col fin de que fuera más fácil dempués cargales a la hora de tener que les tresportar. La güela ponía los panes que sacaba del forno enriba’l puyu (Genta Fernández,8-96).
Hai un antiguu cantar que diz:
Maruxina ponte’n puyu,
y del puyu llama a Xuan,
que tan les fariñes feches,
y la vaca ensin catar.
puzu. m. Fuyu que se fai en baxo afondando hasta dar con agua./ 2. Pequeñu fuyu con agua, arregláu pa qu’el ganao puea beber nél./ 3. Sitiu d’un río apropiáu pa bañase.
Deja una respuesta