Esta conocida llosa de Santa Bárbola afáyase dientro la fastera del pueblu de Perabeles, y estiéndese dende'l llavaderu d'El Prau Llamargu, pela parte riba, basta'l mesmu río principal de la parroquia, pela parte baxo. Na so parte cimera llevántense cuatro cases, de les que tres preséntense adosaes formando un mesmu bloque, mientres que la cuarta apaez un puquiñín más abaxo.

Nesta semeya, tomada dende la casa de La Carpintería nun neváu día de la estación ivernal, vese, en primer términu y na parte mandrecha del espectador, la chabola de La Cordedera de César, el llavaeru del pueblu y el bloque de les tres susodiches viviendes, encabezáu pola casa de Mara la del Campesino, seguía de la casa de Blanco, y, por último, la casa de Manuel ya Irunda. Na parte izquierda tenemos la casa de Lin y Jamina.

Al fondo, a la mandrecha, apaecen delles cases d'El Cantu, mientres qu'hacia'l centru tenemos el pueblicu de La Robellá. Lo que s'acolumbra más a lo lloñe ye'l pueblu de Veró con El Valle les Fuentes y el Picu Tres Conceyos detrás.