La casa de La Cantera afáyase, na fastera de Perabeles, dientro de la finca de Los Nozales, polo que tamién, a veces, la xente pue referise a ella con esti caberu nome de Los Nozales. Los oríxenes d'entrambos topónimos son bien tresparentes: una cantera ye un sitiu del que saca piedra pa emplegalo na construcción de cases o cuadres. Paez ser que, precisamente, trabayóse allí, tiempu atrás, nuna cantera.

En cuanto a Los Nozales, trátase d'un fitotopónimu, esto ye, un nome del terreno rellacionáu coles plantes o vexetales. Na fala de Santa Bárbola, llámase nozal al árbol que da les nueces. Por eso, Los Nozales sería el sitiu nel que s'atoparen una determinada cantidá d'árboles d'esta especie frutal.