LA FORIA //  LA CUERRIA //  MANDA CASTILLA

Agora que, sele, va finando'l branu astronómicu y entama, allegre, l'añu escolar pa rapacinos y rapacetos, queremos, na nuestra fueya barboliega, trabayar, curioso, con nueves idees, que valgan pa entretener y, a la vegada, instruir a la xente barboliego en particular y a lo asturiano y planetario en xeneral. Trátase d'asoleyar un concursu dixital sobre pallabres o espresiones de la fala asturiano del valle de Santa Bárbola del Rei Aurelio.

La mecánica del mesmu ye fácil por demás. Nosotros proponemos un grupu de pallabres o espresiones y los veceros participantes unvíen el significáu qu'ellos entiendan que tienen les mesmes. Lluego, si s'acierta, gánense puntos, y d'esa manera, pasu ente pasu, va iguándose la correspondiente llista de clasificación.

 ¿Val, ho? ¿Tamos enteraos, ne? ¡Pues a por ello, mundiales!

Si asina ye, entóncenes, y si vos paez bien, pa empecipiar, vamos a apurrivos estes dos guapes pallabres: Foria y Cuerria. Y una interesante espresión: Mandar Castilla .

LA FORIA //  LA CUERRIA //  MANDA CASTILLA

Tomás Torre unvía estes rempuestes:

José Ramón González unvía esti mensaxe:

Primero felicitate pol iniciu de la nueva temporá, alluego una apreciación: anque les pallabres d´esta selmana paezme que una la sé, nun dexé d´echa-y un güeyu al dicionariu que ta na fueya y atopé una d´elles. Así que avísote pa que cuando sellecciones les pallabres lo tengas en cuenta, aunque tamién pue ser una bona idea qu'alguna d´elles te allí pa que la xente nos acostumbremos a consultalu o que munchos de los veceros sepan que la fueya ye algo más que guapes semeyes y un concursu. Güeno ahora al turrón.

Cuerria guapa pallabra y mui apropiá pa la seronda, pues si nun m'enquivoco ye una costrucción de piedra que taba nos castañeos. Nella guardábense los oricios, supongo qu'apañaos coles fusties.

Foria  Esta pallabra paezme que significa cagalera, anque nun toi pa ná seguru.

Manda Castilla  Dizse cuando habla'l vino, supongo que n'alusión a la procedencia d´isti; d´aquella nun se conocíen les diverses nominaciones d´orixe.

Una vez más gracies pola fueya y a esperar que la seronda y el invierno nos sean leves.
Un  abrazu de Ramon.

00000000000000000000000000000000000000000000000000000000

Felicidaes a los dos veceros y gracies al amigu Ramón poles sos sinceres amueses de simpatía. Darréu asoleyamos les definiciones correspondientes a pallabres y espresión:

Cuerria: Construcción circular de piedra, d'un metru aprosimao d'altura y ensin techu. Ye propia de los castañeos de la nuestra collación siendo raro o perrraro atopar algún ensin ella. Na cuerria  échense, ensin esbillar, los oricios que se demen cuando la gueta, depués tápense con fueya y cañes o garbos, y déxense allí hasta qu'entama l'inviernu, que ye'l momentu cuando se saquen a la tallera. Pa entós, l'oricu yá ta podre dafechu, y apaecen, pente la h.ueya, guapes y fresques, les sabroses y alimenticies castañes. Notres partes d'Asturies tamién se-y llama a esta orixinal costrucción cuerra y corra.

Foria: Alteración de la dixestión que consiste en echar repetíes veces, pel curso, escrementu en forma llíquido. Ye sinónimu de cagalera y cúrase bien tomando fervinchu iguao cola flor de l'árgoma.

Mandar Castilla: Espresión pela que se da a entender que, nuna conversación, yá nun se dicen les coses a lo cuerdo, sinón que lo que manda y domina na llengua ye más bien el vino, abundantemente inxerío, nesos momentos, por toos los contertulios. El llamar al vino, Castilla, entiéndese por ser ésta la zona de la que provenía esti llíquidu chigrero y espiritoso (la provincia de León tamién se llama aquí Castilla)