Marta González, Daniel Fernández, Xuacu García y Xana Llaneza son los veceros que mandaron rempuesta a les cuestiones sobre fala barboliego de la sesión anterior. Si vos peta vello, abríi y pasái per esta portellica dixital.

La clasificación queda, a partir d'agora, de la siguiente manera:

Daniel Fernández, cincuenta y siete puntos; Joaquín García Cuello, cuarenta y tres puntos; Esteban Carcedo, dieciocho puntos; Tomás Torre, selce puntos; Ramón González, quince puntos; Marta González Llaneza, seis puntos; Casio González, cinco puntos; Xana Llaneza Prieto: tres puntos.

 

ESCARICOSÁU,-Á,-AO // EL SECHURU // LA NIEVE D'AVIENTU DURA UN ARRENDAMIENTU

Aquí vos amosamos, per riba y per baxo d'esta llínia, les nueves propuestes de léxicu barboliego pa los prósimos dis.

ESCARICOSÁU,-Á,-AO // EL SECHURU // LA NIEVE D'AVIENTU DURA UN ARRENDAMIENTU

 

Marta González Llaneza diz:

Hola Xulio:  
Escasicosau paezme que ye resecu o agrietau.
Sechuru paezme que ye una pieza del arau que va delante de la rexa.
"la nieve d'avientu dura un arrendamientu" creo que quier decir que la nieve en avientu dura muncho.
Un saludu.

 

Daniel Fernández García diz:

Hola Xulio:
Escaricosao ye algo así como tiznao. 
El sechuru ye una pieza del aráu que va delantre la timona y qu'abre el surcu na tierra. 
El refrán quier dicir que la ñeve de diciembre dura muncho.

 

Xana Llaneza Prieto diz:

Agora vos voi poner aquí debaxo lo que signifiquen les pallabres siguientes :
     -Escaricosáu : un trazao de lletres mal feches.
     -El sechuru : un fierro en la timona que va hasta abaxo y que forma parte del llabiegu.
     -La nieve d'avientu dura un arrendamientu: que la nieve d'avientu dura muncho.
      Too esto explicómelo mio güelu, que ye mui llistu y sabe explicame les coses mui bien pa que yo les entienda. Gracies, güelu.
 
                                                    
                                         Xana Llaneza Prieto

 

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

Lleíes y analizaes les rempuestes unviaes polos veceros participantes, decídese conceder a Marta dos puntos, y a Daniel otros dos (nun se consideren acertaes les definiciones del axetivu escaricosáu). Xana, pela so parte, agamia los tres puntos

 

escaricosáu,-á,-ao:Que tien caricoses, que presenta estes figures, asemeyaes a llínies ondulaes, como puen ser les que dexa'l rastru d'una culiebra al desplazase. En sentíu figurao tamién se podría aplicar a les lletres mal feches como dixo una de les participantes.

sechuru, el: Pieza de fierro dispuesta en sentíu vertical na timona de la llabiega. Esta especie de cuchilla ye la que, al arar, va faciendo un corte a la tierra col fin de que seguidamente la reya pueda desplazar la secha hacia baxo nel riegu.

la nieve d'avientu dura un arrendamientu: Esti refrán fai una referencia, de xuro daqué hiperbólica (un arrendamientu dura añu) al carácter perdurable de la nieve caío nesti mes del añu, por ser nel que con menor fuerza inciden en tierra los rayos del sol.