EL CUCU CENÓN // LA COQUIÁ // XORRASCAR LA CULIEBRA

Aquí vos amosamos dos guapos nomes y un elocuente dichu de la rica fala barboliego

EL CUCU CENÓN // LA COQUIÁ // XORRASCAR LA CULIEBRA

Daniel Fernández García dixo:

Hola Xulio.

Un cucu cenón ye una lluciérnaga.     

Xorrascar la culiebra ye decir coses escontra una persona pa que-y molesten.

La coquiá creo que ye una planta utilizá pa forraxe del ganáu.

Esteban Carcedo Roces dixo:

CUCU CENÓN llámase así a les luciérnegues, que son unos cocos que de nueche emiten una lluz.
XORRASCAR LA CULIEBRA : dizse cuando se  provoca a ún que nun tenía pensao dicir ná, pero que por tira-y de la llingua suelta lo que tien en papu.

Xuacu García Cuello dixo:

Hola Xuliu:   Lo primero de too, decite, de parte la mio moza, que la semeya que punxisti esta selmana na páxina, paecio-y mui guapa, non sé por qué será...
Ahora vamos coles pallabres que me paez qu'esta semana va fallar algún puntu.
Cucu cenón: Lluciérnaga, gusanu qu'allumbra de nueche. Sobre too pueden vese nes orielles de la carretera.
La coquiá: non sé si pue ser como echar un pigaciu, una siestuca.
Xorrascar la culiebra: Facer comentarios inconvenientes que sabemos que molesten, buscar les cosquilles.
 

Xosé Ramón González dixo:

El cucu cenón.- A mi paezme que ye una polilla que per la nuechi relluz. En castellán ye una luciérnaga.
La coquiá.- Char una coquiá, ye lo mesmo qu'echar un sueñín.
Xorrascar la culiebra  .- Dizse cuando alguien ta tan tranquilu y vien cualquier energúmeno a molestalu, y failo con tanta insistencia que isti salta y pue armase la de Dios. Cuando más tarde alguien cuenta lo sucedío diz "Ná, llegó fulanu y xorrascó la culiebra y claro armóse".
Un Abrazu.

Tomás Torre dixo:

El cucu cenón paeme que ye una especie de gusanu que da un reflexu de lluz pela nueche.

 

 

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

Vistes y analizaes les rempuestes de los cinco anteriores participantes, tenemos qu'apurrir el siguiente veredictu: Daniel, dos aciertos y otros tantos puntos (una rempuesta ye incorreuta). Esteban, dos aciertos y dos puntos (una pallabra nun la contestó). Xuacu, tres aciertos y tres puntos. Ramón, tres aciertos y tres puntos. Tomás, un aciertu y un puntu.

Pasando a otra cosa queremos dar les gracies a la moza de Xuacu pol eloxu que mos fai de la semeya. Tenemos que suponer, pola manera en que vos espresáis nel mensaxe, qu'ella ye de La Cerezal. ¿O tamos enquivocaos?

Cucu cenón, El : Especie d'inseutu coleópteru qu'emite una lluz fosforescente. L'axetivu de cenón que se-y aplica a isti cucu, ye fácil deducir que-y vien dau del fechu de ser precisamente de nueche, a la hora de la cena, cuando la xente lu ve.

Coquiá, La : Pequeña siesta, siempre más llarga qu'un pigaciu.

Xorrascar la culiebra: Irritar a daquién por causa d'insistentes comentarios o d'espresiones molestes que se faen na so presencia. Cuando la persona provocada acaba estallando y soltando lo que tien en papu y quiciás más, dizse, entós, que'l que tuvo xorrascando sacó la culiebra del matu.