• Saltar a la navegación principal
  • Saltar al contenido principal
  • Saltar al pie de página

Santa Bárbola

  • Iniciu
  • Blog
  • Web Antigua

C

ca. ax. Forma apocopá del axetivu “cada”. Ca ún ye ca ún, espresión pa indicar que les persones somos diferenes en caráctery cada ún tien la so propia personalidá.

caballo. m. Mamíferu perisodáctilu équidu (Equus caballus). Tengo un caballo y dos yegües.

caballones. m. pl. Dizse de la especie más grande de formigues que se conoz pequí. Los paxarones del agua métense nos formigueros d’eses caballones y acarrien ahí hasta que lu desfaen tuu.

cabecina. f. Páxaru que fai el nial pente les parés. Tien la cabeza negra y el cuerpu franciscanu, y por eso tamién se-y llama «cabecina negra». Pue ser el que se conoz en castellano como»carbonero garrapinos» (parus ater). Sé un nial de cabecina.

cabreru, -a, -o. ax. Que tien o que curia cabres. Pequí ya nu hai cabreros.

cabriu. m. Ca ún de los maeros que van ente les vigues d’un techu. Estos cabrios son bonos.

cabrizo. n. Dizse del golor a cabra. El quesu esto güele a cabrizo.
Tamién se pue oyer la variante en -u «cabrizu«.

cabruñar. tr. Dar filu al gadañu colocándolu na yuncla y golpiándolu col martiellu. El gadañu cabruñélu ayer.
Modernamente hai unes máquines pa cabruñalu de manera más rápida y cómoda.

cabudañu. m. Primer aniversariu, especialmente referío a la muerte de daquién.

cácaru, -a. m. y f. Fíu d’un tartaranietu.

caciplón, -ona, -ono. ax. Entrometíu, que-y gusta caciplar en too. Esa ye una caciplona, en tolos llaos mete les narices.

cacharru. m. Cualquier vasixa, comu por exemplu el balde, la palancana, el platu, etc. El maíz quitao de la panoya poníase en cualquier cacharru.

cádaba. f. Palu secu de urcia. Vamos buscar unes cádabes pa tiza’l fuebu.

cadena. f. Conxuntu de munchos eslabones arreyaos ente sí pelos estremos. Compré una cadena d’oro pa la medalla./ 2. La de fierro que val p’amarrar les vaques al preselbe. El güe soltóse de la cadena.

cadril. m. Los güesos onde se xunten les zanques col truncu. Va acoxando d’un cadrilón, esa vaca./ Duélenme los cadriles.

cafresna. f. Árbol que se suel ver pel monte, con frecuencia llantáu delantre les cuadres. Tien unos piños en forma platu con unos frutos del tamañu los arándanos, coloraos y reondos pero non comestibles. Pue ser una especie de lo qu’en castellano se conoz comu “serbal”. Nos Enterriegos había dos cafresnes delantre la cuadra.

cagá. f. Escrementu que sale ca vez que se caga.

cagaeru. m. Sitiu onde habitualmente se caga. El cagaeru taba tres de casa.

cagamento. m. Blasfemia, pallabra o espresión inxuriosa. Isi nu apara de char cagamentos.

cagar. tr. Evacuar el vientre.

cagase. prnl. Tirar peos. ¡Vaya cómo te cagues!./ 2. Char cagamentos, blasfemar.

cagaúra. f. L’efeutu de cagar. ¡El rapacín trai una bona cagaúra!.

calabexazu. m. Golpe dáu co’l calabexu. D’un calabexazu cayeron munchos nisos en baxo.

calabexu. m. Palu de cádaba o similar. ¡Voi date con un calabexu!.

calambru. m. Caxu xelu de forma cónico que cuelga a mou estalautita. Los calambros hailos cuando se derrite la nieve y dempués xela. “¡Tar frío como un calambru!” ye comparanza usual na fala llariego.

calamidá. m. Sucesu grave nel que ocurre una desgracia. ¡Qué calamidá!./ 2. Persona mala. Isi paisano ye un calamidá. Ye una calamidá de xente.

calandra. f. Páxaru que se ve pel monte y que se distingue y conoz porque suéltase de repente en barrena escontra baxo mientres esnala.

calcetu. m. Pieza de vestir de tela que cubre’l pie. Pon estos calcetos blancos.

caldar. m. Ubre de les femes de los mamíferos.

caldera. f. Recipiente metálicu grande pa calentar agua. La caldera de la cocina carbón taba roñenta y quitémosla./ 2. Zanxa que se cava pa cerrar les finques; la tierra diba chándose delláu, a la mano riba, y con ello yera colo que se formaba la ribaya. Tamién se conoz comu «cárcoba». La caldera d’esti prau ta toa llena de broza.

caldia. n. Calor mui fuerte, especialmente lo de la cocina, lo roxo. La cocina tien bona caldia y hai que lo mantener.

caleyeru, -a, -o. ax. Candongón, que-y gusta andar d’un llau pa utru ensin facer llabor. Hai un refrán llariegu que diz:

Sol madrugaor y cura caleyeru:
ni el sol será durable
ni el cura será güenu.

calma. n. Tranquilidá escesiva, pereza. Estos gasten muncha calma, van a llegar tarde. La calma nun-yos lo quita naide.

calmusu, -osa, -oso. ax. Que gasta calma, pertranquilu. ¡Vaya calmusu que yes pa comer!.

calzapeta. f. Clase de yerba que crez pel inviernu. Esos páxaros vienen pel invierno cuando echen eses calzapetes peles praeres y eso que llamamos panizo.

calzapollos. m.pl. Calcetos gordos de llana. Hai que te poner otros calzapollinos pa que nun pasas frío.

calzar. tr. Poner calzao nos pies d’una persona. Calza les madreñes que ta moyao./ 2. Poner ferraúres a les caballeríes. Esta yegua nun ta calzá./ 3. Cubrir de piedra los caminos. Les caleyes ahora yá nun se calcen.

calzoncillu-calzoncillos. m. Prenda de ropa interior masculino que cubre de la cintura a les zanques. Los calzoncillos yeren más llargos que los culeros.

calzones. m.pl. Pantalones. Solamente s’emplega na fala actual en frases feches del tipu de Van a caete los calzones. Ta tan delgáu que nun tien pelos calzones.

calláu, -á, -ao. p.p. de callar. Tengo callao muncho./ 2. ax. Que nunca fala más de lo xusto, por humilde. Isi rapaz ye mui calláu y trabayaor.

camberu. m. Varina con un gabitu nun estremu, emplegada polos pescaores pa meter nella les truches que van garrando. Había dis que traía’l camberu llenu.

cambre. f. Paralización momentánea de los músculos. La médica dixo que yera una cambre lo que m’había pasao.

camín. m. Tierra pisao per u se transita habitualmente. Los caminos del monte ahora tan casi tous tomaos de la maleza./ 2. Vía costruía pa dir d’un sitiu a utru. Tolos caminos dan a Roma, ye frase popular pa indicar que siempre hai delles opciones válides a la hora de querer agamiar un oxetivu.

camineo. m. Aición de caminar. Anduvisti muncho y, claro, el camineo cansa.

camineriar. intr. Facer llabores de camineru, arreglar los caminos. ¿Andáis pehí camineriando?.

campa. f. Sitiu llanu, abiertu y de praera, en medio’l monte. Tuviemos merendando nuna campa mui guapa. La diferiencia ente “campa” y «campera» nun s’aprecia ente la xente del valle. Una campera nun tien porqué ser más pequeña qu’una campa «eso ye según cómo se quiera dicir» (Alfredo, informante de Sanamiés, en la cercana Blimea).

campera. f. Campa. «Mia qué campera más guapa pa si quixeras ser malu«, ye rechifla que se cunta d’una moza que diba pel monte col so muzu. Na toponimia apaez casi esclusivamente «campa» pero comu apellativos la xente nun atopa diferiencies ente les dos pallabres.

campesinaje. m. El mundu de los campesinos, lo campesino. Esto yera tolo que s’usaba nel campesinaje: forquiaes, pales, bozales pa les vaques…

campo. n. Yerba qu’entama a crecer nos terrenos que nun lo teníen. Esta tierra ta encampeciendo, ya cho mucho campo.

can. m. Perro. Toi aquí tiráu como un can.
Suel emplegase en sentíu peyorativu.

canalexa. f. Una de les partes del molín. candonga. f. Na frase «andar o dir de candonga» pa dar a entender la afición a salir de casa a falar y tratar con xente en plan d’entretenimientu. A ésa gusta-y muncho andar de candonga.

candongón, -ona, -ono. ax. Que sal muncho de candonga, esto ye, fuera de casa a divertise.

candongueru, -a, -o. ax. Que-y gusta salir de candonga. Los guajes son mui candongueros.

cañal. m. Negociu perproductivu. Un chigre allí ye un cañal.

cañaza. f. El tallu de la planta de la pataca. Vamos quita les cañaces y la broza antes de saca les pataques. cañicar. tr. Mover d’un llau pa utru repetíamente. Vamos al parque a cañicamos.
Paez un deriváu de «caña», pentemedies del deriváu diminutivu “cañica”, quiciaves por ser nes cañes de los árboles onde primero escomencipiaron a cañicase los guajes.

cañicón. m. Aparatu pa cañicase por diversión. Vamos a los cañicones del parque.

cañuela. f. Castaña suelta, ensin l’oriciu, que se topa embaxo pel tiempu la gueta. Les cañueles ruines dexábense.

capaz. m. Chabulu pequeñu que se fai nos gallineros pa que duerman nelli les pites y puean asina tar protexíes del rapusu y la fuína. Les pites yá tan metíes nel capaz.

carba. f. Prau abandonáu que se fexo monte. Los praos malafechiscos quedaron pa carba. «Carba arriba» ye espresión que se diz cuando se va pel monte y hai que llegar a un sitiu más altu ensin arrodiar.

cárcova. f. Caldera, zanxa pa cerrar finques.

cardeña. f. Clase de yerbes que se carautericen por tener la savia blanco como lleche. Les cardeñes gústen-yos bien a los conejos.

cardu. m. Determinada planta herbácea de fueya espinoso. El cardu ye güenu pa curar pero hai que saber cuál ye, eh, nun ye’l que hai pequí.

carecer. intr. Padecer con frecuencia d’alguna enfermedá. Yo carezo de la cabeza.

cargar. tr. Poner o char pesu sobre una persona o un animal. Cárga-y esa sabaná a la yegua./ 2. Meter oxetos nun vehículu pa tresportalos. Carga na furgoneta estos sacos. / 3. intr. Dar frutu un árbol. Eses ablanares isti añu nun cargaron ná.

cargase. prnl. Quedar preñaes les femes. La yegua nun se cargó esta vez.

cargaúra. f. Efeutu de cargar. Mira isti manzanal, ¡vaya cargaúra!

caricosa. f. Ca una de les curves asemeyaes a les que van faciendo les culiebres al desplazase. Los escalagüertos cuerren faciendo caricoses.

carnaúra. n. Constitución física de la persona. Esa muyer ye de carnaúra fuerte. La carnaúra tienlo fuerte.

carquexa. n. Cierta planta melecinosa. Carquexa habíalo en Picu Tres Conceyos, al son de la beriz, posao en monte.

carrascal. m. Ciertu páxaru, de tamañu comu un malvís, que se ve esnalando en bandaes pel monte nos meses de branu.

carreña. f. Vehículu que se movía arrastrándolu; yera una especie de cuerria de vares y per baxo dos tables allargaes que yeren les qu’arrastraben. De capacidá alreor de cuatro o cinco cestaos, tiraba d´ella un animal. Coles carreñes llevaben cuchu pelos carriles.

carretillar. tr. Tresportar col carretillo. Tuviemos tola tarde carretillando tierra.

carriella. f. Xuguete infantil consistente nuna rueda xunía a un mangu pa dir cómodamente rodándola mientres se camina o se cuerre. Mio tíu compróme una carriella de plástico perguapa.

carril. m. Pasu que tenía que se dexar per delles finques pa entrar y salir a otres. Antes, el carril diba pellí.

carro. m. Vehículu de trasporte de traición animal, con dos ruedes. ¡Vaya cómo rincha isi carro!. «¡Vamos col carro asina hasta que rompa la exa!” yera espresión que se solía dicír cuandu al baxar peles caleyes diben frenándolu con un maeru aplicáu sobre la exa. Los «carros del país» tenín les dos ruedes de rayos perpendiculares ente sí, y usábense pal trasporte de la yerba. Los «carros de rayos» tenín les dos ruedes con rayos concéntricos y yeren más propios pa acarriar xente.

cascaeru. m. Sitiu onde se casca fruta (ablanes, nueces…) quedando, polo xeneral, en baxo los restos. Los esquiles dexaron un bon cascaeru debaxo aquella ablanar.

cascar. tr. Frañir la cáscara de los frutos secos como ablanes o nueces. Estes ablanes tan dures de cascar/ 2. Masturbar. Nun hai que se la cascar tanto que ye malo.

cascayeru, -a, -o. ax. Que ye abundante en cascayu. Aquello ye terreno cascayero.

cascayusu, -osa, -oso. ax. Dizse del terreno onde abunda’l cascayu. Tuvieron chando un camín pal tractor y salió cascayoso, sí, d’eso cascayoso.

casería. n. Facienda, el conxuntu de finques, cuadres y praos. Cándido yera de Veró pero tenía ahí casería, ahí en Colláu Escobal.

casina. f. Una raza de vaca. Tenemos vaques casines.

castañéu. m. Sitiu pobláu de castañales. Los mios castañeos toos tienen cuerria.

castañolá. f. Soníu de les castañueles o que se paez al que faen les castañueles. Pensé que yera alguien qu’andaba pela habitación y yeren les castañolaes d’Astor chupando’l deu.

castra. alv. n. Na espresión de estructura «Nun» + «verbu» + «castra», refuerza el sen negativu de la oración. Nun trabaya castra. Nun lo diz castra.

castro. m. Parte de la bolera onde se ponen los bolos. Hai qu’arreglar el castro./ 2. Xuegu infantil que consiste en dir pasando una piedra emburriá pol pie per delles divisiones feches con rayes nel suelu; en castellán «rayuela». En Perabeles xugábemos muncho al castro.

castrón. m. El machu de la cabra.

cataera. f. Aición de catar. ¡Vaya cuentu cola cataera, tolos dis igual!.

cataor, -ora. ax. Que cata. Ya baxen los cataores del monte.

cataora. f. Máquina pa catar. César compró una cataora porque tenía munches vaques.

catar. tr. Sacar la lleche de les femes de los mamíferos, especialmente de vaques, cabres y oveyes. A la Mora pa catala hai que-y amarrar el rabu. “¿Ya catasti?”, frase de saludu mui emplegada ente los cataores.

cavaúra. f. Efeutu de cavar. Dísti-y una cavaúra bona a la güerta.

caxa. f. Recipiente que se cubre con una tapa y que val pa guardar o treportar nel alguna cosa. Apúrrime esa caxa de cartón pa meter nella estes fabes./ 2. Especialmente la que s’emplega pa meter nella una persona difunta.

caxá. f. Güesu de la boca de los vertebraos, onde van enraigonaos los dientes. Paez que me duelen les caxaes.

caxiellu. m. Recipiente u se guarden les ensambles d’abeyes. Los antiguos facínse con un un cachu truncu huecu d’árbol. Isti añu tengo dos caxiellos vacíos.
Nesta voz la pallatal del diptongu nun queda asorbía pola consonante fricativa de la sílaba.

caxina. f. Vaina seca de fabes y arbeyos. Les caxines cómeles el ganao mui bien.

caxón. m. Receptáculu que se pue sacar y meter en güecos apropiaos. Meter al caxón, frase que s’usa pa dar a entender que se ganen bien de perres.

cayuncu, -onca, -onco. ax. Dizse de los perros cuandu tan en períodu de celo. Esos perros anden cayoncos. Esa perra anda cayonca.

caza. f. Uña de los vacunos. A les vaques que tan de cuadra hai que-yos cortar les caces per delantre porque crécen-yos muncho./ 2. n. Aición de cazar. La caza ahora sale bastante caro. Dir de caza, dir a cazar.

cazu. m. Recipiente de cocina, cilíndricu y con pocu fondo, con mangu, onde se tuesta con aceite o se guisa. Vien a ser el castellanu «sartén». Quita l’aceite eso del cazu./ 2. Recipiente de cocina, cilíndricu, de menos diámetru qu’el anterior pero más fundu, con un mangu, onde se calienta la lleche, se fai el chocolate, se cuecen los güevos, etc. Isti cazu ta rutu.

cazuela. f. Especie d’escudiella pa comer nella. Hai que fregar estes cazueles.
Había una rechifla que repetín dellos antiguos y que decía:

“Tarabiti, tachi,
María Manuela,
fabes ena cazuela».

cazurru, -a, -o. ax. Xentiliciu que s’aplica en sen despeutivu a los de Lleón.

cebaera. f. Saca que se cuelga na cabeza los animales pa que coman el piensu que ta dientro.

cebaeru. m. Buracu del pisu de la tená per onde s’echa la yerba o pación al preselbe.

cebatu. m. Texío fecho con bares y tires de maera, usao como pisu de les tenaes o pa separar partes dientro de les mesmes.

cebollal. m. Sitiu plantáu de cebolla. Tengo un cebollal mui guapu na güerta delantre casa.

cebolleta. f. y n. Vid. «yerbalará», planta. Arranca eses cebolletes. Hai muncha cebolleta nesta güerta, nun lo somos a descaniciar.

celebro. m. Muérganu de la cabeza que rixe les funciones vitales. Pámeque-y quedó’l celebro mal.

celemín. m. Antigua unidá de medía menor qu’el copín.

cembu. m. Tira estrencha de terrén que queda separando ente una finca y otra. Vamos a dir pel cembu pa nun pisar lo semblao./ 2. Tira estrencha que queda ensin cultivar al pie d’una sebe.

cencerro. m. Especie de campanina en forma cillíndrica, menos fina que la esquila, que se pon al pescuezu de vaques y borricos. Ayer púnxi-yos cencerros nuevos a la vaca y a la potra./ Tar como un cencerro, tar daqué aventáu o alloriáu. Isi rapaz, polo que diz, ta como un cencerro.

cepa. f. Raíz de los árboles que queda enterrao dempués de cortalos. Eses cepes había que les arrancar.

cerbuno, -a. ax. Aplícase a una clas de yerba que crez nos praos, de fechura cilíndrico, estrenchino y mui duro. L’argaña ye ancha y la cerbuna ye como si fuere filu… son les dos a cual peor pa segar, pero pa curar, la yerba cerbuno cura bien. Y mejor tovía lo argaño.

cereza. f. y n. El frutu de la cerezal. Les cereces tan maúres. Isti añu la cereza ta too podre. Hai delles clases de cereces, que se nomen d’esta manera: d’ambrón, de danza, rebolliegues, piedruques y monteses. Hai, so eso, un refrán que diz: “Les d’ambrón pal mio ventrón, les de danza pa la mio panza y les piedruques pa les muyeruques».

ceriguillazu. m. Páxaru, tamién conocíu como «paxarón del agua». Paez que se correspuende col que se conoz en castellano como «pito real» (picus viridis). El paxarón del agua ye’l ceriguillazu.

cerque. alv. de llugar que denota prosimidad. Nun te pongas tan cerque del jueu.

cerrica. f. Páxaru perpequeñu, que fai en les ribayes el so nial, al qu’entra per un buracu reundu llateral. Los güevos son ablanquiaos con pintines de marrón claru y un llargor de 14 mm. aprosimamente. Suel poner cuatro y aunque se-y quite ún, pue nun refugar. Paez que ye’l qu’en castellano se noma “chochín” (troglodytes troglodytes). Hai cerriques que faen el nial y dempués nun ponen güevos, eses son cerriques viudes.

cerviguera. n. Dolor muscular nel pescuezu, ún de cuyos efeutos ye nun poder xirar bien la cabeza. La cerviguera ye dolioso en forma.

cestáu. m. Cantidá que lleva un cestu llenu. Saquemos nesta estaya más de diez cestaos de cebolles.

cesteru. m. El que fabrica cestos y maniegues. N’Escobal había un cesteru, que morrió de 90 años; yera el padre de Genio.

cestu. m. Recipiente de forma cilíndrico usáu p’acarriar coses una persona. Les patates vamos acarriales en cestos.

ceya. f. Parte prominente ya curvilínea, cubierta pelo, na parte cimera la cuenca’l güeyu. Isti guaje tien les ceyes roxes.

ceyu. m. Espresión d’enfadu que se produz con la vista y les ceyes. ¡Míralu cómo pon ceyu!.

ceyúu, -a, -o. ax. Qu’amuesa enfadu poniendo ceyu. Isi ye ceyúu, ye malencaráu de la vista.

cibiella. f. Varica restorcía que val pa facer dempués un cibiellu. La cibiellina de piquiñina, refrán que mos diz qu’a menor edá ye más fácil educar el carácter de la persona y conseguir bonos modales de comportamientu.

cibiellazu. m. Golpe dau con una cibiella. ¡Voi davos unos cibiellazos…!

cibiellu. m. Aru fechu con vares d’ablanal restorcíes, que val pa cerrar les portielles al xuntar el poste de la portiella col que ta llantáu en baxo. Tamién s’usa pa amarrar la timona de la llabiega al xugu. ¿Per ónde anda’l cibiellu?. Refrán: «Mientres cibiellos tuercen, gües fuelguen», porque nel tiempu que s’igua utru cibiellu nuevu, los animales (y el guaje qu’ayuda) descansen.

cierru. m. Sebe, barganera o utru sistema pa cerrar una finca. Hai que poner al pie’l camín un cierru pa que quede bien.

cigua. f. Na espresión «tener la cigua» equivalente a «tener permala suerte de manera continuá”. Paez que tengo la cigua, siempre me sale mal esto.

cimaliegu, -a, -o. ax. Que corresponde a la parte cimera del árbol. Isti mangu ye cimaliegu, yera meyor de raigañu.

cimblar. tr. Movese d’un llau a utru. Estos postes cimblen poco, tan bien plantaos.

cinchonazu. m. Golpe que se da con un cinchu o con una correa. Tien la marca d’un cinchonazu.

cinchu. m. Parte de l’albarda, en forma de cinta, que va per baxo, per detrás de les pates dellanteres de la caballería, y que val p’amarrar l’albarda al cuerpu l’animal. La yegua tien fluxu’l cinchu.

cíngole mángole. Espresión alv. qu’ indica caminar pesao, llento o dificultoso. Aquella vieya baxaba cíngole mángole pel carril de la llosa. Vid «zángole mángole”.

cintu. m. Correa que se pon na cintura pa tener pelos pantalones. Antes llevábense más los tirantes que los cintos.

cintura. f. y n. Parte del cuerpu que se topa encima de los cadriles. Esa tien poca cintura, la otra tien muncho.

cirigoña. n. Planta herbácea melecinosa, cuya savia, de color amarillento, tien un altu conteníu en yodo. En castellano “celidonia”. La cirigoña ye perbono pa curar les herides.

cirigüeyal. m. Árbol frutal, de la familia de los nisales, que tien de frutu los cirigüeyos. La primer fuente que se garró pa la traída de Perabeles fue la de los Cirigüeyalinos.

cirigüeyu. m. Una clase de nisu, pequeñu y de color azulao violeta cuando ta maúru. La pebía desapega bien de la carne. Refrán referíu a les muyeres:

«Mientres la grande come’l cirigüeyu,
la pequeña arremiella’l güeyu».

nel que s’allaba, de manera evidente, l’altura.

cla. f. Clan, grupu. Paez que vive ahí una cla de gitanos.

clariar. impers. Empezar a ponese’l cielo más claru, esto ye, con menos anublaos, como queriendo salir el sol. Paez que claria un poco.

cobraera. n. Aición y efeutu de cobrar. Lo de la cobraera habrá que lo hablar antes.

cocido. n. Comida consistente en llegumbres cocíes que puen dir acompangaes de pataques, chorizu, morciella o tocín. El neñu diz qu’el cocido ya ta frío.

cocina. f. Pieza de la casa na que se fai la comida. Nosotros comemos na cocina/ 2. Aparatu de calefaición nel que tamién se fai la comida. Esta cocina carbón tira mal. La cocina de carbón consta d’ estes partes: chapa, chapes pequeñes, forna, fornicu, registru, caldera y grifu la caldera.

cocíu, -a, -o. p.p. de «cocer». Muncho tuvi cocío nesta pota./ 2. ax. Dizse de los alimentos que se preparen ferviéndolos en agua. Ayer comiemos carne cocío y hoi un güevu cocíu.

cocusu, -osa, -oso. ax. Que tien cocos. La fruta eso ta too cocoso.

cogorda. f. Seta, conxuntu variáu de plantes talofites ensin clorofila. Les cogordes abunden pelos sitios húmedos y baceos.

cogullu. m. Centru de la llechuga formáu por fueyes bien apretaes y amacizaes. Una lechuga con unos cogollos así…

colondra. f. Ca ún de los chaplones que se coloquen verticales pa formar les parés del horro.

color. f. y n. Impresión que produz, na vista, la lluz reflexao de los cuerpos. Nunca vi ninguna d’esta color. La ropa aquello yera de color negro. Gústenme los colores floxos. El color eso tan chilono nun me gusta.

coloraín. m. Especie de páxaru, que pue ser el que se conoz en castellanu como “camachuelo común” (pyrrhula pyrrhula). El macho tien la papalba colorá y la fembra ye más negra de la cabeza… son los qu’abrasen la flor de les cirueles.

collar. m. Instrumentu de maera que se pon na cabeza del ganao p’amarralo. Tien forma d’arcu y ábrese y ciérrase con una especie de llave de maera tamién. Antes usábense más los collares que les cadenes.

combayar. intr. Vid. «acombayar». ¡Vaya cómo combayes con to padrín, ¿eh?.

combayón, -ona, -ono. ax. Que (a)combaya, que-y gusta (a)combayar. ¡Aquél ye un combayón…!

comeera. f. Aición de comer. Tascar llámase tamién a la comeera.

comeor, -ora. ax. Que come. Esta guajina mía ye mui mala comeora/ 2. Dizse despeutivamente de los que s’aprovechen de los cargos públicos pa medrar ensin cumplir col deber. ¡Nos ayuntamientos nun hai más que comeores!.

comía. n. L’alimentu, especialmente’l que se toma al mediudía, la comía de les doce. ¿Nun me trixisti la comía? La comida nun me gusta frío.
La forma ensin “-d-” ye antigua y yá nun la diz naide nel valle dende mediaos del presente sieglu. Agora emplégase, esclusivamente, «comida» pa l’aceición d’alimentu, y «comía» pa la forma del participiu del verbu: «Ya nun queda comida porque la tarta tamién ta comía…”.

compresación. f. Aición de falar familiarmente dos o más persones. Tamos aquí de compresación.

compresacionar. intr. Falar amistosa y familiarmente dos o más persones. Gústa-yos más compresacionar que tar mirando pa la tele.

compresacioneru, -a, -o. ax. Que tien compresación, que sabe tar falando con gracia cola xente. Sí, home, ella ye compresacionera.

comuñar. intr. Facer comuña, esto ye, facer les coses en compañía y muncha collaboración con otros. El día nochevieja comuñáis allí en casa Manolín.

condergáu, -á, -ao. ax. Malu, porreteru. ¡Quítate dehí condergada que te pues mancar!.

conforme. alv. de t. qu’indica inmediatez ente dos aiciones que se suceden. A aquellos pitos de paxarón del agua conforme los maté yá tuvi que tiralos porque yera too formigues.

contemplar. tr. Tener miramientos y paciencia. Yá nun te contemplo más, failo si quieres.

copín. m. Antigua unidá de capacidá. El copín yera un caxoncín que se llenaba de nueces, ablanes, maíz…

copinete. m. Caxón con fechura de troncu de pirámide, nel que s’echa piensu al ganao.

coquiá. f. Periodu de siesta mayor qu’el pigaciu. La neña cho una coquiá pela tarde.

corá. n. Los polmones de los animales. Al perro che-y la corá, que ye suavino, y comiólo.

corchar. tr. Tapar con corchu botelles o vasixes. La sidra ya tenemos que lo corchar.

corchera. f. Flotaor que se fai con delles cuentes de corchos ataes ente elles. De guajes facimos corcheres pa poneles cuando mos díbemos a bañar al río.

cornal. f. Cinta fina de piel cola que s’ata la mullía na testera de la vaca cuando se ta onciendo. Trai les cornales que vamos atar.

corral. m. Costrución, más pequeña que la cuadra, con planta baxa pal ganao y tená pa guardar la yerba. Tamos faciendo un corral nel prau d’El Vescón. El significáu orixinal de «cercu de terreno» caltiénse na toponimia: El Corral del Bayuetu.

corraleta. f. Caseta pa los gochos, cubil. Vamos llimpiar la corraleta’l guchu.

correor. m. Especie pasillu nun lladral de les cases, abiertu y con barandielles. Los correores tan nel llau soleyeru de les cases.

corrigüela. n. Planta herbácea de tallu rastreru, qu’abunda peles güertes; tien unes flores en forma campana; los guajes usábemoslo pa decorar los horros a semeya de los banderinos de les fiestes. La corrigüela cómenlo los conejos.

corrión. m. Collar de cuero, en forma cinta, que se pon nel pescuezu los animales y onde va amarrada la esquila o’l cencerro.

corro. m. Grupu de persones, animales o coses formando círculu./ 2. Xuegu infantil.

corromplo. m. Persona retoldicona por demás y perrepunante. ¡Vaya corromplo que ta fechu!

cortexar. tr. Tener tratu con persona de distintu sexu con posibles fines matrimoniales. Ayer fui a cortexar. A esta moza cortexáronla dellos rapazos pero ella nun quixo a ningún.

corteyu. m. Cachu de piel que resulta de pelar frutes, pataques y otros alimentos. Los corteyos de les pataques, cocíos, chábense a los gochos ente la esllava.

cortiega. n. Agua no que se tuvieron cociendo castañes. La cortiega tirábase, nun valía pa tomalo.

corviyón. m. Ca ún de los güesos que sobresalen nel xuegu ente’l pie y la pierna de les persones. Nos animales cuadrúpedos, el xuegu qu’articula la zanca y la caña de les pates traseres. Manquéme nisti corviyón.
Hai una copla humorística llariega que diz: 

“Tiéneste por bona moza
y truques los corviyones,
paéceste a la mio vaca
cuando vien de les paciones.”

cosa. f. y n. En xeneral, too lo quien tien entidá inanimao, aunque tamién vale en munches ocasiones pa les entidaes animaes. Compremos munches coses en mercáu. La miel nun se derrite en cosa tan frío como el yogur.

coser. tr. Xunir con filu, xeneralmente enhebrao nuna abuya, dos o más cachos de tela o d’otra materia. Voi a ver si cueso isti botón./ 2. Facer llabores d’abuya. De rapaza tuvo cosiendo con so tía. Conxugación: cueso, cueses, cuese, cosemos, coséis, cuesen.

costanera. f. Zona de terreno en cuesta. La planta del pericón hailo per eses costaneres.
La pallabra «cuesta» restrinxe’l so sen a la pendiente d’un camín. «Costanera» designa, en cambiu, una zona de terreno arrimao.

costazá. f. Carga pesá que se trai en llumbu. ¡Vaya costazá que llevé!. ¡Vaya costazá que me dio esa sabaná que tuvi qu’acarriar!.

costazu. m. Parte superior del troncu humanu, d’onde salen los brazos. Paez que me duel isti costazu.

costellar. m. La zona u s’atopen les costielles de los animales.

costiella. f. Ca ún de los güesos llargos y encurvaos que surden del espinazu y protexen los polmones. Tien les costielles fundíes.

costillar. Vid. Costellar. Lo de riba de la pita ye’l costillar y lo de baxo la pechuga.

cota. f. Cachu de tueriu que se corta dende la raíz. Tenía aquí mio güelu una cota de texu./ 2. La parte baxa d’un truncu. «La castañal pela cota y el roble pela picota» (Refrán que mos indica’l sitiu adecuáu per onde hai qu’entamar cuando se quieren fender los troncos d’esos árboles).

cotolla. f. Grupu de plantes de la mesma especie que crecen xuntes como en piñu. Aquí hai una bona cotolla d’arándanos.

coyeor, -ora. ax. Persona que cueye, especialmente nos llabores agrícoles.
Hai un cantar popular que fala de los coyeores d’esta manera:

Yá s’acerca, yá, la tarde,
ya faen sombra los macones,
ya s’entristecen los amos,
y allegren los coyeores.

coyer. tr. Garrar, reunir, especialmente los frutos del campo. Tuviemos coyendo les manzanes na Cordedera.

coyón. m. Testículu, gónada masculina.

«Tócame los coyones tenía un criáu,
cuando nu-y los tocaba taba paráu«.

L’anterior ye una rechifla-cantar que se diz con intención de correxir la primera espresión “tócame los coyones” cuando ún se da cuenta de que lo que acaba de dicir sona mal.

coyonúu, -úa, -úo. ax. Que tien grandes los coyones. Aquel güe ye coyonúu, ¿eh?/ 2. Fig. Perbunu, perprestusu. Esta sidra ta coyonúo.

criyar. tr. Curiar y sacar alantre los fíos o los menores. Esos jilgueros criyen ahí hom.

cuadra. f. Costrución pa guardar el ganao, con planta baxa pa ello y tená pa la yerba. Nisti pueblu hai munches cuadres.

cuantahoi. alv. t. que da a entender que pasó muncho tiempu pero siempre dientro del día nel que se ta. Cuantahoi que marchó to padre, tuvo esperándote y como nun aportabes…
La espresión «cuánto ha hoi» pue ser l’orixe desti alverbiu temporal modernu.

cuantayá. alv. t. qu’indica que pasó muncho tiempu, saliendo, comu mínimu, del del día nel que se ta. Isi paisano (hai) cuantayá que morrió.
La espresión «cuanto ha ya» podría ser guapamente l’orixe d’isti alverbiu temporal modernu.

cuayá. n. Los cachos gordos y sólidos de la lleche cuayao. La cuayá cómese solo, frío y con azúcar, y pue facese quesu poniéndolo a recudir bien… y después aformienta, ponse cocío, ardío per dientro.

cubil. f. Costrución pequeña, d’una planta, pa guardar los gochos; pue tener un cachu estremáu pa que s’echen en llimpio. Fixi una cubil pa los gochos.

cubu. m. Una de les partes del molín, no alto, per onde entra l’agua pa garrar fuerza col desnivel. El cubu yera onde se metía l’agua y después salía per baxo pel salíu y daba al ruendu.

cucu. m. Nome xenéricu que recibe cualisquier clas de guxán. Estes manzanes tienen cocos.

cucu cenón. m. Guxán que tien l’abdomen fosforescente emitiendo una lluz que lu fai visible pela nueche.

cucu, coca, coco. ax. Cocusu, -osa, -oso, que tien cocos. Estes ablanes tan coques.

cuchá. f. Efeutu de cuchar un terreno. La llosa llevó esta vez una bona cuchá.

cuchar. tr. Abonar con cuchu praos o güertes. Isti añu tovía nun cuchemos.

cuchu. n. Escrementu animal que s’emplega como abonu. El cuchu eso hai que lo llevar pal prau.

cuélebre. m. Culiebrona grande. Viemos un cuélebre que se metió pa la sebe.

cuerria. f. Costrución circular de piedra, d’un metru d’altor y ensin techar, que se facía nos castañeos pa char nella los oricios pel tiempu la gueta. Ahora les cuerries tan toes derrumbaes.

cuerviar. intr. Emitir la so voz los cuervos. Ye desagerao lo que cuervien pehí.

cuestru. m. Tira llarga y fina de maera cola que se forma’l texío de los cestos y maniegues.

cuidausu, -osa, -oso. ax. Que tien cuidao en facer les coses bien. To madre ye mui cuidaosa pa les pataques.

culebrizo. m. Dizse del golor a culiebres. Pequí paez que güel a culebrizo.

culebreru, -a, -o. ax. Que se crien nello bien les culiebres. Isi prau ye mui culebreru. Esto ye culebrero.

culeru – culeros. m. Braguca pa neños y neñes. Traes puercos los culeros.

culiebra. f. Reptil ofidiu, mayor que l’escalagüertu y de piel más sarapulloso, polo que dan más resquizu cuando se ven, anque son inofensives pal home. Per isi llau hai munches culiebres. «Querer sacar la culiebra del matu» = Seguir criticando o metiéndose de mala manera con utru hasta llegar a encendelu.

culiestru. n. Lleche de la fema de los mamíferos nos primeros dis dempués de parir. La lleche primero ye culiestru y el culiestru nu ye güeno pa tomalo./ 2. m. pl. Fariñes que se faen, en vez de con agua, con la lleche nuevo de la vaca recién paría. Vamos a facer unos culiestros.

cullá. alv. ll. Pela parte opuesta del que fala. El camín de carro yera per cullá.

cumbral. m. Cumbre, viga cimera d’un techu onde se xunten les dos vaguaes del mesmu.

cumbre. m. Nel techu, la viga cimera, u confluyen les dos vertientes. El cumbre paez que ta un poco fundíu.

cuntar. tr. Notar ún por ún o por grupos oxetos homoxéneos pa saber cuántes unidaes hai. Ayer cunté más de venti borricos naquella campa./ 2. Creer, tar na cuenta de daqué. Tú ¿cuntes que nun va venir a vete?

cuquiellu. m. Ave migratoria que pasa’l branu ente nós, de collor franciscano. Pon los güevos nos niales d’otros páxaros, ente los que se topa’l papón. Los cuquiellos empiecen a cantar hacia abril.
Hai un refrán llariegu que diz:
«Per San Xuan marcha’l cuquiellu y vien el tabán», porque dexa de sintise’l cantu del páxaru y entamen a picar los tabanes, una especie d’inseutu de branu.

curiar. tr. Vixilar, oservar. Al neñu hai que lu curiar más tovía qu’a ella.

curuxar. intr. Emitir el so cantu’l curuxu. Pel verano curexen muncho esos bichos.

curuxu. m. Ave nocherniega, que pue corresponder cola qu’en castellanu se conoz col nome de “cárabo» (srtix aluco). Los curuxos anden de noche.

cusu. m. Cosa de pucu valor o emportancia. Tira al fuebu el cusu isi que nun val pa ná. ¡Isti cusu ¿pa qué nun lu quitáis? que ta aquí atorollando!

cuyar. f. Cuyara.
Hai una canción infantil pa entretener a los rapacinos mientres comen, que diz asina:

“Maolín pin pín
tien los fíos en molín,
nun tien nada que-yos dar
más que miel ena cuyar,
la cuyara taba rota
y too-yos caía na boca.»

cuyara. f. Istrumentu compuestu de mangu y palina cóncava que s’usa pa llevar la comida a la boca. Hai que poner les cuyares na mesa.

cuyará. f. Cantidá que lleva una cuyar. Tenía poca gana y comió unes cuyaraes namás.

cuyarón. m. Cuyara pergrande usá pa sacar comida de les potes y tarteres y chalo nos platos. Apúrrime’l cuyarón pa sacar los zancaxos de la tartera.

chana. f. Páxaru pequeñu, de tamañu paecíu al gurrión, picu puntiaúcu y una especie reondel negru na cabeza. Vése comiendo figos cuando empiecen a tar maúros. Pue ser el que se conoz en castellano como “ruiseñor bastardo” (cettia cetti) o tamién el “acentor común” (prunella modularis). Eses biches, yo, pa mi, son les chanes… ye como un gurrión, casi mayor, ye la chana y abrasen, eses, el figu… Si fai el nial pelos matorrales, ye la chana.

chancerón, -ona, -ono. ax. Bromista. Eso ye xente chancerono.

chapa. f. y n. Fueya de metal, maera o otru material. Eses chapes son d’aluminio. La chapa esto ta caro enforma./ 2. f. La que lleva na parte cimera, horizontalmente, la cocina carbón. Voi a ver si frego bien la chapa./ “Chapes pequeñes»: les reondes y concéntriques de la cocina carbón que tapen el buracu per onde s’echa’l combustible./ “Xuegu les chapes»: Xuegu infantil nel que se van conduciendo, golpeaes colos deos, unes chapes de botelles de bebida, per un camín dibuxáu previamente nuna superficie lisa.

chaparrá. f. Chaparrón, xeneralmente de poca intensidá. Yá pasó la chaparraína.

chaparroná. f. Chaparrón grande. Anoche cayó una bona chaparroná.

chapazal – chapozal. m. Especie puzu pequeñu que se facía nun río o regueru, poniendo tapinos y piedres col fin de bañase nél los guajes pel branu. Nesti prau, que yera de mio padre, aquí, nel verano, facía un chapazal, que bañábemomos ahí ( Oyío en Blimea a Alfredo, del Romeru, 8-95).

chapiscar. tr. Estrozar, destruir. La cuneta, los camiones chapísquenla como ná.

chaplón. m. Pieza de maera en forma de chapa allargada. Estos chaplones tenemos que los serrar.

char. tr. Correspuéndese col castellanu “echar” nes 10 primeres aceiciones, asina como nes 14, 18, 21, 23, 24, 26, 30, 31 del DRAE 1992./ «Char contra danquién» = Falar mal d’elli. ¡Qué manera d’hablar chando contra él!./ char el lluriu: Poner la timona de la llabiega desviá nel xugu escontra una de les dos vaques de la pareya. Hai que char el lluriu a la Pinta, que cuerre muncho./ 2. Descargar n’otros el trabayu y la responsabilidá. A isi rapaz gústa-y muncho char el lluriu a so madre./ char cangu alantre: alicar, ameyorar, salir p’alantre nuna situación difícil. (emplégase sobre too en frase negativa). Isti xatu yá se me feguraba a mi que nun chaba cangu alantre.

Conxugación: «echo, eches, echa, chamos, chais echen»; «ché, chasti, cho, chemos, chastes, charon«. Sólo hai aféresis en posición átona de la «e-«.

chare. m. Pallabra qu’apaez na espresión «cagar en chare» y que s’usa pa dar a entender el permalu resultáu d’una aición que se pretendía saliera correcha. Al paecer, tien el so aniciu nuna frase dicha por un probe, natural del valle mierense d’Urbiés, qu’andaba muncho per la Hijuela hacia los años cuarenta d’isti sieglu: «El mio fiyu cagó en chare», onde “chare” ye l’adautación a la fala barboliego de la che vaqueira de la forma “tsare” (llar) que ye propia de la zona d’Urbiés. ¡Mira la qu’armasti ahí!,¡como’l que cagó’n chare!.

chicoria. n. Sucedáneu del café, fechu con la raíz tostao de la planta que se conoz en castellanu como “achicoria”.

chocar. intr. Gustar, prestar (suel emplegase en frase negativa). Eso que ponen pela tele nun me choca ná.

chonfla. f. frase en plan de broma o guasa que se cunta o se diz. Gabino la Caya tamién dicía: «Fui a correr la novia a Candás y tuvi que salir culo atrá», son chonfles hom».

chuchu. m. Besu, especialmente falando de los rapacinos. ¡Ai!, ¡la nena ya sabe tirar chuchos!./ 2. Caramelu. Cumi estos chochos que tan mui ricos.
Paez que nel sen de “besu” esta voz nun tien metafonía, mientres que nel de “caramelu” sí.

chuchu, -ocha, -ocho. ax. Majareta, que nun rixe bien de la cabeza. La paisana yá ta un poco chocha, la probe./ 2. Percontentu. Tuvieron una nieta y tan chochos con ella.

chumazu. m. Montón pequeñu de yerba, menor qu’el balagar, que se fai en prau cola yerba que ta poco curao.

chupu. m. Oxetu con una parte en forma pezón pa que los rapacinos chupen y s’entretengan. Isti nun quier chupu.

Espubliza nes tos redes sociales:

Compartir en X (Twitter) Compartir en Bluesky Compartir en Facebook Compartir en WhatsApp Compartir en Telegram Compartir en Pinterest Compartir en LinkedIn

03/06/2025 - Julio Llaneza Publicado en: Diccionariu Barboliegu

Interacciones con los lectores

Deja una respuesta Cancelar la respuesta

Tu dirección de correo electrónico no será publicada. Los campos obligatorios están marcados con *

He leído, comprendo y acepto la política de privacidad

Footer

El nuestru e-mail: xllaneza@telefonica.net
 

Visitantes

N/A
Güei 7
Ayeri 52
7 últimos díes 406
Mes de payares  0
Añu 2026 0

Copyright © 2026 · Peraveles.com