PREGÓN DE LA FIESTA'L POTE DEL AÑU 2000

POR

PABLO XUAN MANZANO RODRÍGUEZ

Distinguíes reina y dames d’honor de la fiesta, miembros de la Comisión de Festexos, vecinos del valle de Santa Bárbara y demás componentes d’esti festivu auditoriu:

Recibii’l mio saludu con esti pregón, que supón un sofitu lúdicu y optimista a l’allegría, de la que de xuru yá vierten estos díes tolos pueblos del Valle.

Siempre camenté que Santa Bárbara tenía’l so pregón permanente flotando nel ambiente dende fai munchos años: el pregón de la forma de ser de les sos xentes. Pero pregón quier dicir anunciamientu. Pregón ye’l prólogu d’una obra, nesti casu, de la obra festera y folixera qu’entama.

Yo, que nun soi d’esti Valle, siéntome un poco esmolecíu al faceme pregoneru d’estes fiestes de fondu raigañu. Yo, que nun nací nin en Perabeles, nin en L’Escobal, nin nel Cantu les Mates, siento mieu a nun ser a aponderar, como bien se merez, esta parroquia con tantes glories ya hestoria grande. Al nun ser d’equí, llamentablemente nun tengo recuerdos d’una infancia corriendo peles caleyes del pueblu, bañándome nel ríu, asistiendo los domingos al catecismu o xugando nel patiu les escueles de El Corralón; esi tipu d’escenes tan típiques y efectives nun pregón.

Pero’l nun haber nacío nel valle nun quier dicir que nun tea apegáu a él:

- Tán mui presentes na mio memoria les hestories que cuntaba mio güelu, Justo’l capataz, que trabayó na mina Santa Bárbara a lo llargo munchos años y a quien quiero dedica-y un emotivu recuerdu.

- Dende piquiñín, munches vegaes venía con mio pá, mio ma y los mios hermanos a visitar, y de pasu a merendar, a casa Milio’l Carteru, con quien nos xunía una gran amistá.

- Foron munchos los collacios de Santa Bárbola que tuvi como compañeros nel Institutu de L’Entregu.

- Na mio yá llarga carrera profesional, primero nel Institutu de L’Entregu y llueu nes escueles de Sotrondio y Blimea, tamién foron munchos los escolinos d’esti valle que tuvieron y tienen la suerte o la disgracia de soportame.

- Dende neñu, siempre vini a les Fiestes de El Pote, y yá van bastantes años que soi collaborador del porfolio y sociu de Festexos.

Dende siempre, nos pregones de les fiestes, fálase de la hestoria del llugar. Suelen ser datos repetitivos, pero ye conveniente insistir nellos, pos a los más vieyos pue escaecése-yos y los más mozos pue que nun los sepan. Asina, nel porfolio de 1.987, Jesús González Maestro, cuntaba que:

“Al marxen de les fantasíes propies de la hestoria y del folclore del nuestru Valle, lo que sí resulta innegable, al menos nun entamu, ye que les tradicionales Fiestes del Pote, cellebraes na Parroquia de Santa Bárbola de Sotrondio, cumplirán próximamente’l so primer centenariu.

Los primeros datos oficiales so la cellebración d’estes fiestes, paecen remontase a 1.890 (lo que quier dicir que nesti añu 2 000 cumplen 110 años.

Cuenten les vieyes cróniques que na última década del sieglu XIX, existía en Santa Bátbola una illustre muyer que tolos años, nel día de San Bartolomé, cedía parte de la so propiedá pa la cellebración de la fiesta. Per aquel entós, el prau nel qu’anguañu se fai la fiesta nomábase “La huerta la romería”.

Nun entamu, les fiestes recibíen el nome del santu al que taben encomendaes, ye dicir “San Bartolomé”. Ensin embargu, más palantre, los feligreses de Santa Bárbara entamaron a llamales “Fiestes del Pote”, pos dende siempre fora costume colocar un pote pergrande con tres pates de fierro nel centru’l prau la fiesta.

Entovía queda xente que s’alcuerda de les engarradielles qu’había tolos años nes fiestes: el barullu entamaba del mou más cenciellu, pos bastaba con que daquién ayenu a la parroquia dixera “Abaxo’l Pote”.

Nel añu 1 787, el Valle Santa Bárbola yera un barriu de Sotrondio al que se-y llama “La Hijuela”. Ensin embargu, la capiella d’un pueblu tan pequeñu tenía un llibru de fábrica, lo que resulta mui estraño, teniendo en cuenta la so direuta dependencia de la parroquia de Sotrondio. Un sieglu dempués, l’Obispáu d’Uviéu concede l’autonomía a la Ilesia de Santa Bárbara, alquiriendo entós la categoría de parroquia, con independencia de la de Sotrondio.

El llibru más vieyu que se conserva nesta feligresía data del añu 1 678 y ye un manuscritu entituláu “Libro de la ermita de Santa Bárbara”. Esto fai pensar qu’esti Valle pudo gozar de determinaos privilexos, nun se sabe a ciencia cierta por qué.

Nel añu de la so fundación taben censaos na parroquia 850 persones y 170 vecinos. En 1 964 el censu yera de 2 300 habitantes. En 1 981 baxó a 1 300 y, anguañu, ye de 1 000 h. aproximadamente, repartíos en 400 families.

Al entamu la mio exposición, dicía que Santa Bárbola tenía’l so pregón permanente flotando nel ambiente dende hai munchos años; y que yera’l pregón de la forma de ser de les sos xentes.

La xente de Santa Bárbola, ye xente amante d’hestories. Hestories enllenes de superstición, enllenes de maxa, enllenes d’encantu, enllenes de pasión. Asina, Armando Ordiz, “ Portelas” cuntaba so la hestoria de S.M.R.A. lo siguiente:

Diz la hestoria que’l Rei Aurelio nel sieglu VIII estableció la so corte nel llugar de Samartín y ello dio motivu pa que nel sieglu XIX, al constituyise en conceyu independiente de Llangréu, la fastera occidental del mesmu, se nomase el nuevu muinicipiu de S.M.R.A.

Pero la hestoria vien munches vegaes xunía a la leyenda y ésta señala que’l Rei Aurelio tuvo dos fíes y dos fíos, nomaos Martín, Andrés, Bárbola y Mª de las Nieves.

El Rei, al morrer, repartió ente los sos fíos el territoriu que llueu sedría’l conceyu d’anguañu y que por eso llegaron a nomase les parroquies que lu componen, San Andrés, la parte que-y correspondió al príncipe Andrés; San Martín la parte que-y correspondió a Martín; Santa Bárbola a la princesa Bárbola y Santa María de Las Nieves, la de Mª de las Nieves.

Avelino Zapico, de El Colláu Escobal diz qu’allá no alto Santa Bárbara, nel Valle Les Fontes, hai una fonte nomada de les Xanes. A les 12 la nueche del día San Xuan salen d’ella dos muyeruques, piquiñuques, espatarraes, a les que la xente-yos llevaba güevos pa convenceles que-yos cuntasen el so misteriu y pa que-yos dieren un tesoru qu’elles teníen guardáu, pero aquelles muyeruques enxamás quisieron escuchar a nadie.

El mesmu Avelino Zapico cuenta que fai unos cuantos años, na casa de Florenta La Casuca, en Perabeles, a lo llargo de delles nueches daquién llamaba a la puerta con unos golpes suavinos y como nadie contestaba al requerimientu de quién llama, tenía mui intrigaos y amedrantaos a tolos de la casa. Una nueche, dempués de varies siguíes de sentir estos golpes unos vecinos fueron hasta ellí a ver que pasaba. Namás sentise los golpes, un home salió de casa y dempués de comprobar que nun había nadie nel corredor ni en nenguna otra parte, escondióse pa comprobar si yera obra de dalgún guasón y poder sorprendelu. Cuando llevaba un cachu escondíu, entrugó: “¿Siguen picando?”.

- Sí, como siempre, contestaron dende la casa.

- Per equí nun hai nadie, añadió l’escondíu.

Entós Florenta dixo: “Si yes Gaspar, da tres golpes; si yes mio pá, cuatro, yá vos echaré una misa.

     Actu siguíu dieron tres golpes: tras, tras, tras, y nun se volvió a sentir más. Ante el mieu mostráu por toos, Florenta dixo: “Gueno, acabóse, yá dixi qu’echaba una misa”.

     Dende aquella nueche nun volvieron a picar más a aquella puerta.

     Gaspar yera fíu de Florenta que fuera fusiláu al finar la Guerra Civil n’Asturies y asinamesmo so pá tamién taba difuntu.

     Sigue Avelino Zapico cuntando que nun monte de Santa Bárbola nomáu La Seca, hai una fonte del mesmu nome y d’ella, el día San Xuan salía un filu d’oru y una voz que dicía:

- “Devanar, devanar, que les doce van a dar”.

Había qu’enduviellar el filu nun palu, pero si nun se terminaba esi llabor pa les doce la nueche, el filu metíase pa dientro y yá nun se podía sacar el tesoru qu’ellí había nin desencantexar una moza que taba encantexada na fonte.

Ernesta Orviz González, de El Molín diz que nuna ocasión, en Santa Bárbara, hubo un agüeyamientu del que resultó agüeyada una yegua que yera mansulina como una malva y nun se movía por nada. Celestino, el so amu, taba percontentu con ella, pero un día que-y cargara una sabaná de pación nel prau que tenía cerca’l Pozu La Olla, allá nel ríu, al llegar a l’aldea de La Nieta, encontróse con Andrés y la yegua entós mesmo empicipió a dar blincos hasta que tiró la carga al suelu.

“Yá ta, camentó Celesto; la yegua ta agüeyada y el que l’agüeyó foi Andrés.

Avelino Bernardo González, tamién del Molín cuntaba qu’a Facio’l de La Cerezal llegaron-y rumores de que la xente decía de qu’él agüeyaba, y quiso cerciorase de si eso yera verdá, porque él nun lo sabía; y un día metióse dientro d’un horru y púnxose a mirar pel furacu que quedara al cayer un nuedu d’un tablón de la colondra .

     Primero, acercando’l güeyu drechu al furacu, miró pa la parexa vaques que taben arando na finca del prau Fuente y nun pasó nada; llueu, miró col otru güeyu y... ¡cataplún!, les vaques cayeron pates arriba.

- “De.... dios, dixo Facio, ye verdá lo que dicin”.

Luis Zapico Rozada, de El Cascayal dicía que en Colláu Escobal había una vaca de bona raza que siempre tenía malos partos, malográndose los xatinos.

Una hermana l’amu la vaca, y sin qu’ésti lo supiera, creyendo de bona fe que l’animal taba agüeyáu o codiciáu, que ye otru de los males producíu polos agüeyadores, encargó que-y llevaran una botella d’agua a una desagüeyadora de La Llosa’l Portiellu, en Blimea, pa untar con ella’l llombu l’animal y llibralu del mal de güeyu.

Toes estes hestories foron recoyíes por José Ramón López Blanco (Ramón el Gallegu), yá fallecíu, vecín de Blimea y casáu nesti Valle.

La xente de Santa Bárbola ye xente amante de lo suyo, xente amiga de conservar, por exemplu, los horros, esos elementos arquiteutónicos tradicionales que puen pasar desapercibíos pa les persones qu’anden o viven al dellaú d’ellos, pero que lleven, en munchos casos, cientos d’años colocaos. Horros con elementos decorativos d’orixen mui vieyu. Asina, atopamos talles pequeñes na cabecera de los lliños y de les trabes nun horru de Miera d’Arriba; talles en forma roseta en Perabeles y Cantu les Mates; motivos decorativos asitiaos nes puertes, enriba de les que munches veces apaez un arcu, que tamién puen vese n’horros de Perabeles.

Los dos llugares del conceyu que tienen mayor númberu d’horros y paneres son Perabeles, con cinco horros y una panera y Llavallos, cuatro horros y una panera, los dos d’esti Valle.

     La necesidá de triturar los cereales pa facilitar el so consumu y asimilación pol organismu humanu tuvo nel Valle una solución apaecía a la del restu Asturies; anque equí la bayura regatos y el tener el ríu atravesándolu posibilitó una gran concentración de molinos hidráulicos, quedando ún qu’entá se mantién na Rebollá.

El fechu de qu’entovía se conserven un gran númberu d’esplotaciones agrícoles familiares dedicaes fundamentalmente a la producción de mazanales, da llugar a munchos llagares pa facer sidra. La sidra que se consume na espicha que tolos años organiza la Comisión de Festexos de El Pote provién d’un d’estos llagares familiares.

La xente de Santa Bárbara siempre foi de traer madreñes y boina, prendes típiques del vestir de los asturianos dende tiempos inmemoriables. Cuanta mio madre, que vivía en Bruselas un señor de Sotrondio que se llamaba Graciano Canteli que, va munchos años desempeñaba’l cargu de cónsul d’España en Bélgica. Nuna ocasión, con motivu del entierru de la reina Beatriz, ma del rei Balduíno, diba tol cuerpu diplomáticu de la nación vecina en coches descapotables desfilando pela calle principal de Bruselas. En plenu desfile, esti Sr. Canteli vio na acera un home con boina y madreñes que taba presenciándolu, y dixo pa sí: “Esti home tien que ser de Santa Bárbara”. Mandó para el coche, llamólu, entrugó-y d´onde yera y ¡¡ efeutivamente yera de Veró!!.

Son munches más les anécdetes que se podíen cuntar de xente del llugar; pero vamos dexalo pa otra ocasión, pos saldría un pregón más llargu de la cuenta.

     Nun quixera finar ensin tener un recocimiento especial a persones d’esti Valle, portadores de munchos saberes y siempre dimpuestos a collaborar con estudiosos en trabayos d’investigación, recoyida de toponimia, tesis doctorales, etc. Por citar dalgunos d’ellos:

     El yá mentáu Milio’l Carteru.

     Risco, de la Paré.

     Dionisio y Eloy Ordiz, de La Cruz.

     Álvaro, Genta, Juia y Leno, d’El Rezaleru.

     Benjamina, d’El Praón.

     Antón y Pura, de La Seca l’Agua.

     Daniel Iglesias y Esteban Glez., d’El Escobal.

     Joaquín y Alba d’El Montesín.

   Serino Orviz, Manuel Orviz, Clemente Llaneza, Delfino Cuello, Eulogio Ordiz, Benjamina Glez., Vicente Calleja, Manuel González Llaneza, toos de Perabeles.

Etc, etc, etc......

     Reconocimientu extendíu a los miembros de La Collación, asociación asturianista qu’hubo en Santa Bárbara nos entamos de la democracia y que la formaben, ente otros Xulio y Manolín Llaneza, los hermanos Pandiella, Tino ‘l del Puente, Isac Orviz y otros de los que siento nun m’alcordar de los sos nomes.

     Distinguíes reina y dames d’honor de la fiesta, miembros de la Sociedá de Festexos, vecinos del Valle santa Bárbola y demás componentes d’esti festivu auditoriu: dende esti momentu tenéis cuatro díes pa tar de folixa, pa canciar y baillar, pa fartucase y emborrachase... digo bien fartucase y emborrachase, porque yá sabéis que:

     “El que bebe................ emborráchase,

     el que s’emborracha..... duerme,

     el que duerme............... sueña,

     el que sueña.................. nun peca,

     el que nun peca............. va al cielu,

     Y, puesto qu’al cielu vamos...

     ¡¡ A pasalo bien y a fartucamos ¡!

     Munches gracies por escuchame, pasailo bien y arriba’ Pote.