El pueblu de La Casa Cima queda na costanera izquierda, según el correr del agua, del valle principal de la collación de Santa Bárbola, depués de pasar El Colláu Escobal, subiendo pela carretera, y antes d'aportar a Los Caleyos. Ta formáu por un conxuntu de cases que s'esparden, como se puede apreciar nesta semeya, pente les finques de la rodiada.
L'orixe del topónimu resulta claru y tresparente, nun ofreciendo delguna dificultá interpretativa. La Casa (de) Cima (la casa de lo cimero, la de lo más alto) sería la primer casa que se construyó aquí. Y asina sería como la conoceríen los habitantes de La Seca l'Agua, que ye'l pueblu que s'afaya pa baxo, na vertical, y que yeren los que la situaben na parte cimera de la fastera de so. Depués de la primer vivienda, y pasáu un tiempu, diríen sucesivamente construyéndose les otres, pero'l nome yá nun se modificó y quedó fixáu d'esa manera, en singular.