El pueblu d'El Corral Nuevu alcuéntrase al poco d'empezar
el ramal de la carretera que va de La Regüelta la Teyera a Llabayos.
Visto dende enfrente queda ente los pueblos d'El Corralón y d'El Praón,
too ello na costanera izquierda del valle principal de la collación.
Esti topónimu ye de los que nun ofrecen delguna dubia interpretativa.
La pallabra asturiana "corral" sirve pa designar, na fala del nuestru valle,
una construcción, xeneralmente ubicada dientro o al pie d'un prau,
con una planta baxa destinada al ganao, y una parte superior o tená
onde s'almacena la yerba curao.
Pero, amás d'esta acepción, la voz corral tamién tien
la de "sitiu cercáu ensin techu onde se guarda'l ganao, la reciella,
los aperios", como podemos comprobar si consultamos el Diccionariu de la
Llingua Asturiana.
Esti segundu significáu ye'l que mos paez adecuáu p'aplicalu
al topónimu d'El Corral Nuevu. Hai que tener en cuenta qu'allí
cerque, a unes escases decenes de metros, alcontramos tamién
l'actual pueblu d'El Corralón (semánticamente "el corral grande").
Y too paez indicar qu'a pesar del tamañu qu'espresa la forma aumentativa
d'esti caberu nome, los antiguos pobladores del territoriu vieron la necesidá
d'iguar, de preparar, un nuevu corral que cubriera les necesidaes derivaes,
probablemente, del aumentu del númeru de reses.
Al principiu, sería, sencillamente, el corral nuevu,
esto ye, el sitiu cercáu nuevu, y ensin que se viera, al pie
d'ello, casa delguna pa persones. Les viviendes vendrín más
tarde col pasu de los años o de los sieglos. Agora sólo ye
un pueblu, y, polo que sabemos, yá nun queden nin restos nin señales
del antiguu recintu onde se recoyía la reciella o les vaques.
