El Calerón ye'l nome d'un barriu del pueblu de Perabeles,
formáu por tres cases y unes cuantes costrucciones anexes, amás
de les tierres y praos de la rodiada. Allégase a él garrando,
n'El Follerón de la Caya, la llamada Carretera de la Polaúra,
y tomando, poco dempués, al pie de La Fuente'l Turnu, el ramal que
xira a la izquierda y que pasa per El Cantu Xerru y La Llaera, antes d'aportar
propiamente a lo que ye El Calerón. Aquí acaba la pista pa
coches y sigue l'antiguu camín de sacramento que, pasando, antes,
per El Fonticu l'Argayón y per La Valli Milaños, allega, más
tarde, hasta'l pueblu d'El Rezaleru.
Esti topónimu ye de los que nun ofrecen delguna duda na so
interpretación llingüística. Un calerón
nun ha de ser otra cosa que un caleru grande. Y un caleru ye
una especie de fornu, iguáu, afechiscamente, pa la fabricación
de cal, a partir de la piedra calizo, que fai, nesti procesu, de materia
primo. Esta piedra, desmenuzao, previamente, en cachos pequeños, mecíase
dientro del caleru con carbón, prendíase-y, lluego, fuebu a
esti combustible, y el calor diba tresformando paulatinamente la piedra.
Según testimoniu directu d'Álvaro Suárez, natural
de La Robellá y vecín d'El Rezaleru, nesti mesmu sitiu
d'El Calerón tuvo funcionando un fornu de cal fasta la década
de los años cuarenta del pasáu sieglu. El paisano que lu llevaba
yera Alvaro Caleyos. Esti fornu yera, precisamente, el más grande
de los que tuvieron en funcionamientu per aquellos tiempos na parroquia de
Santa Bárbola, esceptuando el qu'hubo en Co la Ilesia, que yera, polo
visto, el de más moderna construcción. Otros caleros d'entóncenes,
yeren el de Gracianín, en la Llosa Nueva d'El Rezaleru, el de
San Vis, en Les Sayetes, el de Lin n'El Batán, y el d'Álvaro
Suárez en Tres de la Xerra de La Robellá.
