El pueblu d'El Bericiusu afáyase na costanera izquierda
del valle de La Cerezal y pue considerase como'l más importante d'esta
gran fastera barboliega. L'antigua escuela, a la que yá, nos caberos años, nun diben alumnos, tresformóse nun modernu edificiu qu'alberga'l centru
social de pensionistes.
L'orixe etimolóxicu d'esti topónimu nun tien delguna
dificultá interpretativa, pues paez bien claro que tien que provenir
d'una espresión del tipu el (sitiu, llugar) bericiusu,
esto ye, aquel nel que se desarrolla bien y abunda la beriz, esa conocida
y común planta de los nuestros montes, de la que saben aprovechar el
néctar (materia primo melífico), les abnegaes ya incansables
abeyes de los nuestros caxiellos.
La población menguó bastante nos últimos años.
Hai muncha menos xente agora que va diez o quince años, pero hai que
reconocer qu'esto asocede non sólo aquí, nesti pueblu, sinón
tamién nel conxuntu de la parroquia de Santa Bárbola y de tol
conceyu de Samartín. Asina, según el Institutu Nacional d'Estadística,
tenía "El Vericioso" (d'esta manera, con esti nome tan finu, ye como
lu conocíen oficialmente), concretamente, 24 habitantes (11 varones
y 13 muyeres), nel pasáu añu 2003.
Na semeya que tenemos colgada aquí debaxo, tamién podemos
ver otros dos pueblinos cercanos: ún ye El Costayu (a
la derecha), y l'otru, L'Azorea (pa riba).
