EL VOLCÁN ACTIVU MÁS ALTU DEL  MUNDO YE BARBOLIEGU

 

Como siempre, y cuando vas a utru país, trates d’adaptate a los vezos d’él, y como pequí too ye dicir qu’hai que contratar un guía pa dir a los cumales de cualquier altor, a los parques, a los tolos llaos… pues fixemos lo mesmo, pero tien que ser un guía por ca dos persones. Tamos yá avezaos a recatiar, que ye cosa normal nesti pais, incluso a veces pídente ellos a ti que pongas preciu... cerremos el tratu nuna axencia  pero con un guía pa los cuatro, porque consideremos que pa decimos per ónde yera’l camín paecíamos que yá yera abondo 160 $ ca un, eso sí, preparábamos la comida nel refuxu y diba cuntándomos coses pel camin d’acercamientu dende Quito al parqueaderu del parque nacional Cotopaxi.

          A les nueve y media la mañana del sábadu, tábemos chando les cargues nel tou tarrén pa dir a la conquista d’“El Cuello de la Luna”  delantre l’hotel  onde tamos de posá dende’l primer día, y a les diez menos cuartu  chaba yá fumu pel tubuscape’l carro, como ellos aquí-y llamen a los coches, camín d’agamialu. Trés h.ueron les hores que mos llevó’l carro, non sin antes facer alguna pará técnica a sacar fotos,etc..

          Una vez nel parqueaderu, a 4500 m. garremos les mochiles a llumbu y con tola ferramienta, más la cantidá sobrante de comida suministrao pol  guía Marco, caminemos tres cuartos d’hora fasta aportar al refuxu a 4810 m. Esti ta perbién acondicionáu, afayaízu y bien distribuíu. Yeren les dos de la tardi, aprosimao, y ente aperitivos, beber fervinchos, y al poco, cenar, a les seis de la tarde tenía yá una fartura comigo que tuvi qu’andar dando paseos pela habitación antes de dir pa la cama a les seis y cuartu. Tan hidratáu taba qu’a les nueve despertóme la gana mexar, y, perezusu y con galbana, nun me quedó utru remediu que tirame fuera la llitera y salir a verter agües a les lletrines que taben fuera, pasando daqué frío porque taba xelando depues de tar nevando unes cuatro o cinco hores. Otra vez na cama  enroscáu y ensin casi dame cuenta yá siento pellí ruxir a la xente escaciplando colos bártulos pa escapar pal cume, yeren les doce menos cuartu, yo esperé ta  y diez. Otra farturina d’almuerzu, y  a la una y cinco y con pasu seliquino del too empecipiemos l’esguilamientu del Cuello de Lluna. En media hora yá tuviemos que poner los crampones. Marco, amarráu con Rozada, y la otra cordada  formada por Manolo delantre, Cortés y Merina.

          La filera xente que formaba les casi venti cordaes que pelos arrimadiellos  del glaciar arriba diben dibuxando un rastru de lluces de collores blancos, bermeyos y amariellos, paecía un “cucu cenón”. Suplía asgaya  ver cómo pasaba’l tiempu  y nun acababa de riscar l’alba, al mesmu tiempu que diben abandonando cordaes y na nieve ca vez yera mas fondo la guelga. Rozada quexábase  ca poco y dicía que s’atopaba mal, hasta qu’a los 5500 m., aproximao, dixo que nin utru pasu más, y acompañáu de Marco dio la guelta pa baxo. El restu siguimos subiendo anque viendo cómo ca vez yeren  menos les cabeces qu’allumaben. Tamién los ánimos  menguaben en nós, fasta que los güelgueros cabezaleros se pararon por perdese la sienda debío a la cantidá de nieve  cayío. “Aquí morrió’l de los nabos”, pensé yo pa mi. Tovia yera de nuechi, miro’l reló, falta poco p’amanecer, tovia hai esperances.... como fue. Los dos guíes de dos cordaes que diben delantre empecipien a topa’l camín, y güelguiando como los demonios, pero non en sin dificultá abondo pa los que per detrás díbemos, superábense pasicos cumplicaínos con valentía y fuercia. Un canalizu de cuarenta metros, d’unos setenta grados, fue l’alternativa al camín normal, por topase ésti con mas d’un metro nieve fresco. Cien metros faltaben namás pal cume y el mio cuerpu  esllamargaba de gayola, miraba pa los mios collacios, n’os conocía, taben desfiguraos, cares daqué hinchaes, dame por cuntalos a toos, yéremos unos venti, yera de día pero’l sol nun lu vimos, taba a la otra parte.... la tiesta dába-y trabayu al maxín, y, cuando menos me lo espero, una basnia  fedionda d’azufre faime recordar que toi nun volcán vivu. Un cuartu d’hora más y el mundu enteru per debaxo de nós. Les vistes, precioses, mar de nubes, abrazos, semeyes, acuérdeste de tol mundo (UN ABRAZU A TOUS) pensé  a mio manera.

          Tan  tranquilos tábemos  que cuando mos quiximos dar cuenta marchemos los postreros pa baxo, xusto detrás d’otra cordada, y too mui guapo hasta aportar a la canaleya famosa onde topamos atascu por la xente ponese a facer rapel cuando nós tábemos convencíos de baxar culo atrás y pioletando y cramponiando salvar aquello. Nun fue asina, y, con  una enclenquitú espantoso, fexo que tuviéremos qu’esperar allí dos hores a que mos tocara la vez. Aseguré a los mios collacios al piolé espetáu en baxo y descolgándolos col ocho (ferramienta amañoso  pa  descolgar un pesu), salvóse la situación. Yá llevaba media hora qu’había emborrinao y tábemos daqué tallúos de frío, pero, como los demonios,  espabilemos con too, y depués d’una hora y media de supliciu, aportemos en sin novedá al refuxu pasando a tres cordaes que per delantre de nós diben.

          En sin dexase engalbanar metiemos nes mochiles too lo dexao nel refuxu, y, ayudaos por Rozada que ya taba recuperáu, colemos camín abaxo hasta garrar el carro que-y llevaría tres hores traemos a Quito, les cuales vini dando cabezazos escontra la maniella la ventanilla y en sin enterame del camín pa ná, apigaciando too seguío, aportemos a la pensión toos contentos.

          Vamos recuperar dos dis y pal Chimborazo.

 

           Siguimos en contautu!!!!!