Tomás Torre y José Ramón González mandaron rempuestes a la primera sesión del nuevu concursu

Hola collaciu. Como yá sabíes, les primeres palabres nun pudimos contestales, así que vamos con estes.

              EL CARRASQUIYU: Ye xugar coles ablanes, facer un montón.

LA GRAE: Ye un aparatu de maera y unos fierros con pinchos pa desfacer los tarrones.

TAR ENSIN ACEPILLAR: Tar como una cabra, como una verza o como un burro. Un saludu.

Animau p´ol resultau de la primera entruga, allá voi coles d'esta selmana:
El carrasquiyu Ye un xuegu con ablanes, pones 3 ablanes en baxo xuntes, y una encima formando una pirámide. Y con otra biques. Y, si desfaes el carrasquiyu del utru xugaor, les ablanes son pa ti.
La grae,ó gradia ye un utensiliu agrícola compuestu d'un armazón de maera con unes rexes afilaes. Úsase, ó meyor usábase, tirando d´el una parexa de vaques. Con él desfacínse les seches que sacaba'll llabiegu al arar les tierres pa semar patates, maíz, escanda....
Tar en sin acepillar, eso ye lo que me diz a mi la mio muyer. Dizse d´alguien que se comporta d´una manera torpe y non mui finamente, vamos, a lo bruto. A mi gústame más dicir que lo que soi ye un diamante en bruto.
Un abrazu. Ramon.

Creo que lo de tar ensin acepillar ye tar xabaz, a lo lloco.

La grae yera pa gradiar la tierra depués de llabrar, pa desfacer los tarrones y que quedara suelto pa sembrar.La grae yeren cuatro maeros con pinchos llargos de fierro, que se ponía una piedra encima y así desfacía mejor los tarrones.

Hola Xulio:
Ya que cambiasti'l concursu, vamos a participar tamién.
- El carrasquiyu ó carrasquieyu, ye un xuegu que se xuega con ablanes. Pónemse tres xuntes y una encima d'elles. Y el xuegu consiste en desfaceles tirando otra ablana como si fuera pa xugar a los banzones.

- La grae ye un utensiliu de llabranza que s'usaba pa desfacer los tarrones depués d'arar. Consiste nun artilugio de madera con unos fierros clavaos, que se-y ponía una piedra encima, y tiraben d'ella les vaques xuncíes.
- Tar en sin cepillar dizse cuando alguien fai alguna barbaridá o diz alguna burrá ( vamos, que ta como una maniega).
Un saludu.

El carrasquiyu, carrosquiyu o carrosquíu, que con estes tres varientes se puede oyer, ye un xuegu infantil que se practica con ablanes. Pa ello hai qu'iguar tantos montones d'ablanes como participantes. Estos montoninos, que tamién reciben el nome de carrosquiyu, tan formaos por tres ablanes xuntes y una más enriba d'elles. Cada guah.e prepara'l so montón y depués, tando de pie y a una distancia determinada, tira, cada ún, una ablana escontra los montones procurando que quede lo más cerque posible de dalgún d'ellos. Una vez que tous acabaron de tirar, ye cuando se miden les distancies ente cada ablana y el correspondiente montón. El que más cerque lo tenga ye'l primeru que tira o birla, intentando derribar algún carrosquiyu. Si lo consigue, amás de ser les cuatro ablanes pa él, tien derechu a siguir tirando hasta que falle, si ye'l casu. Lluego ye cuando tira'l siguiente, y asina sucesivamente hasta que yá nun queden carrosquiyos.

La grae o gradia ye un preséu de madera de fechura rectangular o cuadrao con pinchos per debaxo y que s'usa pa desafacer los tarrones, allanar la tierra, quitar la broza, etc. A la aición de char la grae o gradia llámase-y "gradiar", anque tamién esta pallabra tien el significáu de "andar muncho d'un sitiu pa otru".

Tar ensin acepillar ye una espresión que s'emplea pa dar a entender qu'una persona tien unos modales o una conducta basta y xabaz, ensin delgún tipu de bonos modales. L'orixe de la espresión hai que lu buscar na comparanza que se fai cola madera que tá cepillao y lo que ta ensin cepillar, yá que lo basto y sarapulloso de la corteza que tienen les pieces naturales, cortaes polos maeristas, conviértese, depués de pasá-y el cepillu del carpinteru, en superficie fina y suave al tactu .