Continuamos ensin dar col sitiu que representa la imaxe propuesta pal concursu semeyil porque nun mos aportó delguna rempuesta a la entruga pa la identificación de la semeya de la portada anterior. Poro, la clasificación sigue, por segunda vegada consecutiva, de la mesma manera:  Narciso Suárez Llaneza, seis puntos; Xosé Antón Camblor, cinco puntos; Xuacu García Cuello, tres puntos; Vicente Suárez Suárez, tres puntos; Ástor Llaneza Prieto, dos puntos.

Y aquí apurrimos, agora, un nuevu enfoque del llugar col enfotu de que-yos pueda valir daqué a los participantes pa saber por fín ónde demontres mos alcontramos. ¿Qué ye y ónde s'afaya lo que representa la imaxe de qui enriba?

NUEVAMENTE TAMOS ENSIN DAQUIÉN QUE SEYA A IDENTIFICAR LA SEMEYA

Narciso Suárez escribió un mensaxe el día 11 de payares de 2012, que diz asina:

 Entós, como anduvisti pehí fundu, la cuadra esa caía tien que ser la de Ludi, ahí delláu de La Mayá La Señora. Yo conocila ensin fundir, hai años que nun baxo pehí abaxo.

Asina ye, n'efeuto, trátase del corral que fexo Benino, el padre de Ludi y Maribel, nel so prau de La Xerra les Escobes, delláu de La Mayá la Señora.