Queremos ufrir al conxuntu de los veceros una nueva perspeutiva del sitiu qu'apaecía na imaxe de la portada anterior. Suponemos que d'esta manera será bastante más fácil dar cola ubicación precisa del mesmu. Poro, facemos nuevamente la pertinente entruga:¿Qué ye y ónde s'alcuentra lo que representa la semeya de qui encima?

Narciso Suárez contestó:

 A ver Julio, será que nun la saben o que nun s'enteró naide de la maniobra. Eso ye de Sidoro nos Santarriegos, vese al fondo'l prau de to tíu de La Encruciyá.

Efetivo, asina ye, Narciso, el prau y la cuadra que se ven na parte superior de la semeya son La Encruciyá de mio tíu César.

Gustaríame añadir un comentariu a la forma que tu dices de Los Santarriegos, y ye que tengo por seguro que la manera correuta de nomalo, anque muncha xente lo pronuncie asina, nun ye esa, sinón que ye propiamente Los Enterriegos, esto ye los terrenos que tan, que s'alcuentren, ente riegos, lo que se pue comprobar, n'efeutu, fixándose nos tres praos que lleven esi nome.