Queremos dicir que mos presta abondo'l fechu de tar recibiendo enforma
correos, nel nuestru buzón ellectrónicu, con rempuestes correctes
a la entruga sobre la semeya de la portada. Estes son les que tenemos esta
vegada:
Marta González Llaneza.- Xulio: Esta vez nun tengo ninguna duda,
esta semeya ye del mio pueblín Perabeles. Vense, ente otres coses,
la casa Madina la Carnicera, la casa onde Luisa tenía la tienda, el
quiosco Angél, la cochera Aida, etc.
Esteban Carcedo Roces.- Hola Xulio: Nesta ocasión ye bastante
más fácil. La foto ta sacá desde la casa que'l to cuñáu-y
compró a Roberto'l de Chorique, en Perabeles, y nella vese la cochera
de Lalo'l d'Aida; y detrás, la casa onde tenía la tienda Jamín
el de Luisa (q.e.p.d.).
Miguel Ángel García Suárez: Esta semeya ye delante
La Casa'l Pueblu, en Peraveles, y los pilotos son Alberto Hevia y Pin. Un
saludu desde La Cruz.
Jorge del Recerezal: Nun sé si tendré suerte nesta vegá,
porque la semeya ye perfácil. Paezme una semeya de Peraveles, más
esatamente lo que se ve ye la casa onde Luisa la d'Antón tenía
el comerciu. Un saludu pa toos los collacios que s'asomen a esta páxina
tan prestosa. Jorge.
Ramón González Suárez.- Hola Xulio: La semeya ye
del pueblu Perabeles, más concretamente ente Casa Aida y El Sucu la
Yana. Un saludu.
Jesús Orviz González: Esta vegada ye perfácil. La
semeya ye en Perabeles, y la casa que se ve ye onde taba'l comerciu de Jamín
y Luisa; y un poco pa tras vese tamién la carnicería de Madina
y Costante. ¡Pero, bueno ! ¿Quién ye isi del coche amariellu?
A mi nun me paez de la parroquia, además, ¿pa ónde va
tan corríu? Debe ser que ye la fiesta La Polaúra y tien mieu
llegar tarde a la puya´l ramu.
Sergio Camblor: La d'esta selmana ye la entrá a Perabeles
subiendo de Sotrondio. Al fondo ta la casa de Costante; más pa
ca, onde tenía Jamín el comerciu.
Joaquín Suárez: Mui guapa la instantánea del rallie
delante casa Jamín, en Peraveles. Saludos.
Demelsa González Viña: Esta ta fácil. Ye´l
día el rally, na curva d'El Sucu la Yana. Al fondu con la casa de Catalina,
lo que yera'l puestu Jamín, que me trai munchos recuerdos,cuando mio
güela Menchu me mandaba por recaos, que siempre protestaba por dir hasta
lla. Un saludu.
Felicidaes a toos, pol puntu merecidamente agamiáu. Lo
que nun sabíemos, Miguel Ángel, yera la identidá de los
ocupantes del coche, pero yá mos acabes de sacar de dudes.