Al buzón dixital de la fueya barboliega, aportó, nesta ocasión, un únicu mensaxe con rempuesta a la entruga sobro la identificación de la semeya de la portada anterior. Furando per esta buraca virtual podemos lleelu dafechamente. La clasificación agora, depués d'esti aciertu, amuésase de la manera siguiente: Toño, ventinueve puntos; Narciso, ventinueve puntos; Berto, venti puntos; Xuacu, selce puntos; Ástor, tres puntos; Lluis Ánxel, dos puntos; Daniel, un puntu; Xana, un puntu; Xosé Ramón, un puntu; Demelsa, un puntu.
Nueva entruga pa nueva fotografía nesti concursu semeyil: ¿Qué ye y ónde s'alcuentra lo que representa la imaxe de qui encima?
Narciso Suárez dixo:
Esta, si ye onde digo yo va a ser difícil porque ta escondío. Paezme que ye en La Corrá la reguera que baxa de la Fuente Rebollal (La Reguera La Pieza), el muro que se ve ye la canal que lleva l'agua al llavaeru que ta al pie la panera (detrás de casa Pepe y Medita). De guah.es xugábemos a facer pantanos y armábenmos les muyeres unos jaleos de la virgen porque emporcábemos l'agua del llavaeru al meter tapinos y lladrillos p'atacar. Había qu'entretenese n'algo, yeren otros tiempos. Si nun ye, paezse muncho, hai años que nun entro p'ahí.
| Efetivamente la semeya ta sacada nel barriu perabeliegu de La Corrá. Poro, ye correuta la rempuesta unviada por Narciso, lo que-y val pa ganar un puntu y ponese como tiesta de la clasificación xeneral: Narciso, trenta puntos; Toño, ventinueve puntos; Berto, venti puntos; Xuacu, selce puntos; Ástor, tres puntos; Lluis Ánxel, dos puntos; Daniel, un puntu; Xana, un puntu; Xosé Ramón, un puntu; Demelsa, un puntu. |
Correuta la rempuesta de Narciso