La imaxe correspondiente a la portada anterior nun la identificó naide. Delgún correu aportó al buzón dixital con esa intención. Poro, vamos a mangar otra semeya del mesmu sitiu con un enfoque un migayín diferente, a ver si eso val p'ayudar daqué a la desnortiada vecería. Hai que dicir qué ye y ónde s'afaya lo que representa la imaxe de qui enriba.

Darréu d'ello la clasificación queda, evidentemente, de la mesma manera:

Narciso Suárez Llaneza, quince puntos; Lluis Ánxel Suárez, dolce puntos; Daniel Fernández García, once puntos; Xuacu García Cuello, diez puntos; Xosé Antonio Camblor, ocho puntos; Demelsa González Viña, siete puntos; Corralón Azul, cinco puntos; Xurde'l Recerezal, cuatro puntos; Ástor Llaneza Prieto, cuatro puntos; Xurde Alberto García Fernández, dos puntos; Xosé R. González Suárez, dos puntos; Xana Llaneza Prieto, un puntu.

Narciso Suárez Llaneza diz:

Paezme que ye'l bebeeru de La Fuente'l Berizal. Un saludu.

Efetivamente, tanto nesti casu como nel de la semeya de la portada anterior, atopamos un primer planu del bebeeru que recueye l'agua de La Fuente'l Berizal, que cuerre cerque de la campa del mesmu nome, dientro del terreno de la collación de Santa Bárbola, fastera d'El Monte Muñero.