Cuatro correos con sendos mensaxes y rempuestes a la entruga sobro la identificación de la semeya de la portada anterior. Pasái per esta portiella si les queréis ver y lleer. La clasificación agora queda de la siguiente manera: Narciso, ventitrés puntos; Toño, ventiún puntos; Berto, dieciocho puntos; Xuacu, once puntos; Ástor, tres puntos; Lluis Ánxel, dos puntos; Daniel, un puntu; Xana, un puntu; Xosé Ramón, un puntu; Demelsa, un puntu.
Nueva semeya cola so entruga: ¿Qué ye y ónde s'alcuentra lo que representa la imaxe de qui encima?
Antón Camblor escribió:
Julio, paez que t'arrimes algo pal mio valle. Esta téngola enfrente de mio casa, son les cases de La Fócara.Narciso Suárez escribió:
Eses cases vense desde La Cerezal, en frente. Llámase La Fócara. Tan tamién pa esa zona Los Pedrazos, si nun m'enquivoco paezme que son de hí Polo y Madina. Saludos.Alberto González escribió:
Que tal Xulio. Son les cases de La Fócara, nel Valle La Cerezal.
Oyi, l'otru día baxando fixéme que'l lletreru de PERABELES, que ta n'El Cantu, ta escritu con B. ¿Que ye con V, con B o pué escribise coles dos? Yo escribílo siempre con V y tú tiéneslo tamién con V. Será que'l lletreru fíxolu'l Principáu ensin entrugar a naide y púnxo'l nome con B .Xuacu García escribió:
Siguimos pela zona de La Cerezal. Estes son unes cases qu'hai enfrente de La Cerezal. Llámase La Fócara. Tovia nun tuvi allí nunca, pero tengo gana dir hasta lla pa ver qué vistes tienen dende lli. Saludos.
| Correutes les tres rempuestes de los
veceros participantes. Son les dos cases de La Fócara na costanera
mandrecha del valle de La Cerezal. Como bien diz Narciso, cerca de
hi ta la casa de Los Pedrazos, d'onde yeren, efetivamente, Polo y
Madina, actualmente vecinos de Perabeles. Queremos matizar que La
Fócara pertenez a La Cerezal, ta dientro de La Cerezal, ya qu'esti
ye'l nome col que se designa a tol valle. Nun hai que caer na
confusión de nomar como la Cerezal a los pueblos d'El
Bericiusu y La Espesura. El Bericiusu, La Espesura, Les Cases de
Baxo, etc. son pueblos de La Cerezal. La Cerezal ye tou'l valle. Contestando al comentariu de Berto referíu a la grafía correuta d'esti caberu pueblu, hai que dicir que a través de los sieglos fue escribiéndose de manera diversa unes vegaes con V (Peraveles) y otres vegaes con B (Perabeles). Si atendemos a una posible etimoloxía según la cual el nome podría venir d'un antropónimu (nome de paisanu) Pere Velez, probable fundador del pueblu n'algún añu de la época medieval, tendría que ser con V. Pero eso nun ye seguro del too, ye solamente una posibilidá. Y como resulta que durante les caberes décades, a lo llargo del sieglu pasáu, venía apaeciendo normalmente con B, fue por ello que se decidió que fuere con esta lletra. Y asina resulta, qu'actualmente ye únicamente oficial la forma Perabeles, tal como reza nel decretu de toponimia aprobáu pol gobiernu d'Asturies en febreru de 2008 http://www.smra.eu/node/1185
|