Esta vegada solamente aportó un mensaxe con rempuesta a la entruga sobre la identificación de la semeya de la portada anterior. Podemos velu pasando per esta portellica dixital. La clasificación sigue como taba: Toño, trenta y cuatro puntos; Narciso, trenta y dos puntos; Berto, venti puntos; Xuacu, decisiete puntos; Ástor, cuatro puntos; Lluis Ánxel, dos puntos; Daniel, un puntu; Xana, un puntu; Xosé Ramón, un puntu; Demelsa, un puntu.

Y pasamos a amosar una nueva semeya cola so correspondiente entruga:¿Qué ye y ónde s'alcuentra lo que representa la imaxe de qui encima?

Toño Camblor escribió:

Julio, dibes coyer la muerte con tantu regueru, esto yá ye muncho mas soleyero, estes casines son El Recerezal, pehí paezme que vivía Manolo Viña.

Narciso Suárez escribió:

Esta ye fácil, ye d'El Río Cerezal, la casa de la izquierda ye la de Manolo y la de la derecha la de Gayo y Margarita. La debaxo de les colunes nun sé de quién ye, yo viviendo habitualmente nella nun m'acuerdo de conocer a naide. Bueno, el sitiu concretamente toi de escucha-y a Jose que ye El Rebollal. La del regueru tienes razón nun yera tan escondía, pero ná, pasé a Veró y teníala detrás de casa, h.a h.a h.a h.a. Saludos.

 

Los dos mensaxes son acertaos na rempuesta qu'unvíen y valen p'apurrir a los sos remitentes sendos y valiosos puntos pa enllenar les sos fardeles particulares. Únicamente tenemos que facer una pequeña corrección al nome dau por Narciso pa designar a esa parte del pueblu d'El Recerezal. Ye verdá que tien muncho que ver colos árboles conocíos como rebollos, pero'l so nome auténticu nun ye El Rebollal, ye El Rebollusu. 

La clasificación camuda mui poco y queda de la siguiente manera: Toño, trenta y cinco puntos; Narciso, trenta y tres puntos; Berto, venti puntos; Xuacu, decisiete puntos; Ástor, cuatro puntos; Lluis Ánxel, dos puntos; Daniel, un puntu; Xana, un puntu; Xosé Ramón, un puntu; Demelsa, un puntu.