Media ocena de mensaxes, remitíos por sendos veceros de la fueya barboliega, foron los que mos aportaron, esta vegada, al buzón dixital. Y. mirái qué bien, los seis llevaben rempuesta correuta a la entruga sobro la identificación de la semeya de l'anterior portada. Veilo too, si vos peta, clicando nesti enllace.

Dempués d'esto, la clasificación queda modificada de la manera que darréu amosamos:

Demelsa González Viña, siete puntos; Narciso Suárez Llaneza, siete puntos; Daniel Fernández García, siete puntos; Lluis Ánxel Suárez, seis puntos; Xosé Antonio Camblor, cinco puntos; Xuacu García Cuello, cinco puntos; Xurde'l Recerezal, cuatro puntos; Corralón Azul, cuatro puntos; Ástor Llaneza Prieto, tres puntos; Xurde Alberto García Fernández, dos puntos; Xosé R. González Suárez, un puntu.

Mangamos, agora, nueva foto pa la identificación. Hai que dicir qué ye y ónde s'afaya lo que representa la imaxe de qui enriba.

 

Narciso Suárez Llaneza diz:

Ye La Campa'l Berizal.

 

Xosé Ramón González diz:

Tengo nestos momentos un ataque d'Alzheimer que mete mieu. ¡Mira que pasé veces pehí camín de Muñero! Paezme que se llama  La Campa'l Verizal. Y vese la "guapa" llinia d'A.T. de Lada-Velilla. La semeya debisti tomala diendo pa La Seca. Por cierto, cerca d'esa campa hai una fuente coyonuda.
 

Daniel Fernández García diz:

Hola Xulio.

Eso paezme que ye diendo pa Los Enterriegos, pa lla de La Polaúra. El sitiu creo que ye El Vescón.

Un saludu.

 

Xosé Antón Camblor diz:

Paezme que ye La Campa María Cruscáu, que ta enfrente de Veró.
 

Lluis Ánxel Suárez diz:

Hola Xulio, esta última paezme que ye La Campa'l Berizal, ente La Encruciyá y Muñero.
Ta lluego. 
L

 

Xuacu García Cuello diz:

Hola Xulio.
 La semeya d'esta selmana nun toi mui seguru, pero paezme que ye una campera que s'encuentra pela pista que se garra enriba Los Enterriegos y que baxa pa Muñero.
                                                                                                                    Saludos.
 

=================================================

La semeya d'esta portada reflexa, en primer planu, la imaxe de lo que ye La Campa'l Berizal, na costanera derecha del valle Muñero. Esta guapa campera atopámosla nel camín que va de La Campa la Encruciyá escontra los praos de Muñero, dempués de pasar Los Enterriegos y antes d'aportar a La Xerra'l Regáu.

Poro, nun podemos dar por válides les rempuestes apurríes por los veceros Xosé Antón y Daniel.