Siguiendo'l conseyu de los visitantes que mos animen a recuperar el vieyu concursu semeyil de la fueya dixital, vamos a principiar otra vegada a facer preguntes a los veceros sobre la identificación de semeyes referíes a sitios y llugares del nuestru queríu valle barboliegu. Prúyemos volver a probar la pericia observadora y la memoria paisaxística de los nuestros fieles visitantes. Y qué meyor, pa ello, que traer aquí y agora esta enigmática fotografía

¿Qué ye esto que representa la imaxe de qui enriba? ¿Ónde s'afaya? ¿Cómo se llama?

Narciso Suárez Llaneza escribió: Paezme que ta en Los Caleyos y que ye la fuente la faya.

Alberto González Orviz escribió: La semeya principal fue tomada en La Fuente les Xanes, na parte baxo d'El Bescón de Ludevina, llugar nel que tuvi munches veces. Ahí ye onde s'apaecen na Nueche de San Xuan tres xanes con un tesoru, siempre que la persona qu'acuda sola sea quien a enrollar un filu d'oru que sal de la fonte "Devanar, devanar, que les doce van a dar..."
Un saludu.  Alberto González Orviz------------Les Argayaes.

Ástor Llaneza Prieto escribió: Paezme que la semeya esa ye el camín que pasa per onde La Valli Tenovia, ente El Corralón y El Caleru, al pie del bebederu esi qu´hai ellí.

Tenemos que dicir que la rempuesta correuta ye la d'Alberto González Orviz. Trátase de la mítica Fuente les Xanes, no cimero d'El valle les Fuentes. Poro, Alberto estrena la llista clasificatoria con un valiosu puntu en so haber.