Allegaron, nestos tres caberos díes, al buzón dixital de la fueya barboliega, dos mensaxes con rempuesta a la entruga sobro la identificación de la semeya de la portada anterior. Fueron de los veceros Xuacu y Toño, y podemos velos tranquilamente franquiando esta cenciella pasera virtual. Dempués de los correspondientes y obligaos cambios, la clasificación queda con un empate nos dos primeros puestos, peremocionante como nunca, asina:  Narciso, ventiocho puntos; Toño, ventiocho puntos; Berto, venti puntos; Xuacu, selce puntos; Ástor, tres puntos; Lluis Ánxel, dos puntos; Daniel, un puntu; Xana, un puntu; Xosé Ramón, un puntu; Demelsa, un puntu.

Continuamos apurriendo, al conxuntu de la vecería, semeya y entruga nuevo: ¿Qué ye y ónde s'afaya lo que representa la imaxe de qui encima?

Xuacu García dixo:

Hola Xulio: Esta semeya nun la tengo ná clara, paezme que ta en La Espesura ente lo que yera la casa de Fael, qu'ahora ye del fíu, y la casa de Toni y Vitori. Un saludu.
 

Toño Camblor dixo:

Esti chavulu ta nel pueblu de Les Cases de Baxo, a mano izquierda según se baxa la rampla que da a la carretera. Paezme que ye de Pipi y Jano.

 

Acertada la rempuesta del veceru Toño. Esti chabulu afáyase, tal como él mos diz, nel pueblu de Les Cases de Baxo, a la mano riba de la carretera.

La clasificación agora cambia de cabezaleru y queda de la manera que darréu amosamos: Toño, ventinueve puntos; Narciso, ventiocho puntos; Berto, venti puntos; Xuacu, selce puntos; Ástor, tres puntos; Lluis Ánxel, dos puntos; Daniel, un puntu; Xana, un puntu; Xosé Ramón, un puntu; Demelsa, un puntu.