Aportaron al buzón de la fueya barboliega dos mensaxes con rempuesta a la entruga sobro la identificación de la semeya de la portada anterior, que llamentablemente nun se puen dar por correutes. Poro, la clasificación sigue de la mesma manera na que s'alcontraba:  Narciso Suárez Llaneza, siete puntos; Xosé Antón Camblor, seis puntos; Xuacu García Cuello, cuatro puntos; Vicente Suárez Suárez, cuatro puntos; Ástor Llaneza Prieto, dos puntos.

Vamos, darréu, a ufrir una nueva perspeutiva del mesmu sitiu. A ver si dalgún perspicaz participante por fin la acierta. ¿Qué ye y ónde s'afaya lo que representa la imaxe de qui enriba?

Narciso Suárez dixo:

 Con esta nueva perspectiva cambio d'opinión. Tien que ser la cuadra de La Mayá la Señora (tamién-y llamen La Yaná) de Fael. Y lo que se ve pa baxo, El Valle Les Cubes. A ver si va d'esta.
 

Tamos contentos de comprobar que, polo menos, tuviemos un veceru que fue quien a descubrir ya identificar el difícil sitiu propuestu pa esta ocasión. Ye, efetivo, la cuadra que se topa no cimero del prau de La Mayá la Señora, na costanera mandrecha del Valle Muñero.

Solamente tenemos que precisar y correxir un pequeñu detalle referíu al nome de La Yaná que Narciso propón como sinónimu de La Mayá la Señora. Nun ye esi'lcasu, yá que concretamente La Yaná ye, falando con propiedá, el cachu monte, dientro de la costanera mandrecha del valle Muñero, que llenda per riba con El Prau Rufo, per baxo con El Río Muñero y pela mandrecha, según el correr del agua, con La Mayá la Señora. Quier dicise que nun ye propiamanete el nome del prau sinón el del monte aquel.
 

Vei el corréu que tamién mandó Narciso pa la semeya ensin identificacr de la selmana pasá (anque yá nun ye válida la rempuesta a efeutos de puntuación)