Ye, realmente, prestoso, pa los que facemos esta fueya,
el recibir, cada vegada, mensaxes enforma, apurriendo rempuesta correuta a
la entruga sobre la semeya
de portada correspondiente. Nesta ocasión, aportaron un total de seis
bonos correos ellectrónicos, de los que vamos a asoleyar tanto'l nome
del remitente como'l testu que llevaben dientro. Aquí van darréu:
Jorge del Recerezal: Como nun llegué a tiempu,
polo que se ve, pa la respuesta de la semeya anterior, nesta vegá,
paezme que voi ser de los primeros. La semeya ye del prau de Luis "El Ruxu"
de Peraveles, na fastera de La Polaúra. A la mano riba, vese la casa
de Juan Antonio.
Esteban Carcedo Roces: Hola Xulio: Esta semeya ye bastante fácil
pa casi tolos veceros, pues ye en La Polaúra y vense los caminos
que tiren: ún, pa Los Enterriegos; y el utru, pa L'Artusu.
Y yo, de guaje, diba pal Prau Llargu.
Joaquín Suárez Ordiz: Xulio, esta ye fácil, pues
ye en La Polaúra. Vese el prau del Ruxu, el de Juan Antonio y la
cuadra Miguel. Saludos.
Miguel Ángel García Suárez : Hola, collacios. Lo
primero, deseavos, a toos/es, un prósperu añu. Después,
contestar la semeya que nos puso Xulio esta semana, que ye arriba en La
Polaúra, llugar guapu onde los haiga. Tamién, aprovechar pa
manda-yos un saludu a la xente que anda per L'Aconcagua, y desea-yos
una buena ascensión. Un saludu desde La Cruz.
Sergio Camblor: Son los praos de La Polaúra que tan según
vas pa la capilla. Ún creo que ye de Ramonín el de Veró.
Marta González Llaneza.- Xulio: ... ye La Polaúra,
ye'l prau de Luis. Al fondo, ta La Campa l'Arquera. La cabaña que
se ve paezme la de Juan Antonio y Emma, pero nun toi segura.
La clasificación queda de la siguiente manera: Miguel Ángel
García Suárez, dos puntos; Marta González Llaneza,
dos puntos; Demelsa González Viña, un puntu; Jorge del Recerezal,
un puntu; Esteban Carcedo Roces, un puntu; Joaquín Suárez
Ordiz, un puntu; Sergio Camblor, un puntu.