Pa estrenase de manera afayaíza y acertada, embochando'l banzón
nel gua del preguntaeru, tuviemos, nestos primeros dis del añu,
nel buzón ellectrónicu de peraveles.com,
los mensaxes de tres conocíos veceros. Realmente, allegaron, en total,
cuatro correos, pero, llamentablemente, ún d'ellos taba enquivocáu,
polo que decidiemos, como facemos normalmente nestos casos, nun lu sacar
a la lluz. Darréu vais a poder lleer los testos de los qu'apurrieron
rempuesta correuta a la entruga sobre la semeya
de portada:
Miguel Ángel García Suárez: Hola collacios.
En primer llugar dai les gracies a tola xente qu'ellabora esta páxina
de la nuesa parroquia, yá que'l so llabor ye encomiable y exemplu
pa toos/es los que d'alguna manera tamos rellacionaos con Santa Bárbola.
Animalos a que sigan coles semeyes y el concursu. Yo contestaré toles
que sepa, por supuestu fuera concursu, yá que lo importante ye lo
entretenío del tema y cómo Xulio nos pon a prueba los nuesos
conocimientos. Bueno, pues dicho esto, contestar la semeya, que pa mi ye
el prau d'El Moreno, q.p.d., en Los Enterriegos. Un saludu a toos/es.
Demelsa González Viña: Bueno, collacios, seguimos col
concursu que nos presta tanto, polo menos a mio pa, mio ma y a mi,
que me manden cada poco mirar si yá se cambió la foto o no,
y eso que mi ma mira ella y ye ella la que nos avisa munches veces que ye
otra nueva. Bueno, ahí va la contestación d'esta semana: son
Los Santarriegos del Moreno, y, al fondu, vemos la escuela de la Perallonga.
Un saludu.
Marta González Llaneza: La semeya pertenez a Los Interriegos
del Moreno, según me dixo la mio sobrina Marlene. Un saludu.