Aportaron, nesta ocasión, al buzón barboliegu, dos mensaxes con rempuesta a la entruga sobro la identificación de la semeya de la portada anterior, que seremos a ver si previamente pasamos per esta portellica dixital. Agora, depués de los pertinentes cambios, la clasificación queda de la manera que darréu s'amuesa:Toño, trenta y tres puntos; Narciso, trenta y ún puntos; Berto, venti puntos; Xuacu, decisiete puntos; Ástor, tres puntos; Lluis Ánxel, dos puntos; Daniel, un puntu; Xana, un puntu; Xosé Ramón, un puntu; Demelsa, un puntu.

Y pasamos a nueva semeya y nueva entruga: ¿Qué ye y ónde s'alcuentra lo que representa la imaxe de qui encima?

Ástor Llaneza dixo:

 Hola! La semeya d´esta vegada paezme que sé cuala ye! L´agua que pinga debe ser del práu de La Vallina, en Perabeles, a la mano riba del camín que tira pa El Xuegu los Bolos y pa El Socorral. Salú ya dixebra!

Narciso Suárez dixo:

Bueno, el disparu de la otra salió de fogueo, non obstante lo que vos dixi de la cascá ye verdá. Yo aquí nel conceyu nun conozo otra que tenga tanta altura. Si veis les fotos que vos dixi yá me lo diréis; tien dos de la misma, nuna vese meyor que na otra, pa vela na realidá ta mal amañoso de baxar allá.
Esta d'esta vez, pa mi ye fácil, ta a cien metros de casa nuestra, concretamente enfrente de la cochera de Manolo Pandiella. Esi pingón suel facese cuando llueve muncho. Esi prau del que cai ye de Lali. El camín que tira arriba ye'l que sal a La Casuca pe La Vallina arriba, o pues tirar per detrás del pueblu y subir a Les Caicima pe La Llosa. Saludos.

Toño Camblor dixo:

Julio, siguimos cola ría. Esto voi situátelo en Peraveles, concretando un poco, entrando pela carretera debaxo de casa de Narciso estrélleste con ello. A la parte baxo hai una nozal o cerezal.Chaoooo. 

 

Precises y acertaes rempuestes les unviaes por estos tres veceros. N'efeutu, esi pingón, que solamente se ve cuando llueve abondo, cai dende'l prau de La Vallina al camín que va (o que vien) ente los barrios perabeliegos d'El Socorral y El Pueblu pasando per El Xuegu los Bolos, onde s'alcuentra "El Bancu los Vieyos", debaxo d'El Castañéu Filomena. El pingón queda enfrente mesmamente de la cochera de Pandiella y, cuando xela muncho, pel iviernu, pue allegar a vese conxeláu dafechu, formando una guapa estampa de calambros estalactíticos.

La clasificación queda, dende agora, de la siguiente manera:  Toño, trenta y cuatro puntos; Narciso, trenta y dos puntos; Berto, venti puntos; Xuacu, decisiete puntos; Ástor, cuatro puntos; Lluis Ánxel, dos puntos; Daniel, un puntu; Xana, un puntu; Xosé Ramón, un puntu; Demelsa, un puntu.