Daniel, Marta y Xuacu, per esti orden, fueron los veceros que mandaron rempuesta a les cuestiones sobre fala barboliego de la sesión anterior. Si vos peta velo, abríi y esclucái per esta ventana dixital.

La clasificación queda, a partir d'agora, y a falta solamente d'esta sesión y otra más pa que fine esta edición del concursu, de la siguiente manera:

Daniel Fernández, sesenta puntos; Joaquín García Cuello, cuarenta y cuatro puntos; Esteban Carcedo, dieciocho puntos; Tomás Torre, selce puntos; Ramón González, quince puntos; Marta González Llaneza, nueve puntos; Xana Llaneza Prieto: seis puntos; Casio González, cinco puntos.

YÁ ACABA'L CONCURSU El prósimu 21 d'avientu van a mostrase les últimes preguntes d'esta edición del concursu

EL / LA RETRANCA // L'ABOCIAERA // EL QUE QUIERA NABOS QUE LOS CAVE Y EL QUE LOS QUIERA GORDOS QUE LOS CAVE FONDOS

Aquí vos amosamos, per riba y per baxo d'esta llínia, les nueves propuestes de léxicu barboliego pa los prósimos dis.

EL / LA RETRANCA // L'ABOCIAERA // EL QUE QUIERA NABOS QUE LOS CAVE Y EL QUE LOS QUIERA GORDOS QUE LOS CAVE FONDOS

 

Daniel Fernández García diz:

Hola Xulio.
 
Retranca ye munches coses: un palu que frena los carros, la picardía y una persona retrasá.
 
Abociaera ye cuando alguien vocia y contáxalo a otres persones.
 
El refrán quier dicir que los nabos hai que plantalos bien fondos, porque si se planten altos son más ruinos.
 
Vaya difíciles que les pones estes vegaes!!

 

Xuacu García Cuello diz:

Hola Xulio:
 
 
    Yá tamos na recta final del concursu y cada vez nos lo pones más dificil. Esta vez voi intentalo coles pallabres porque'l refrán se m'escapa.
el/la retranca: creo que ye una especie de freno del carro del país pa que nun corriere muncho peles pendientes.
     l`abociaera: pol nombre creo que pue ser bostezar muncho.
 

 

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

 

 

Concedemos dos puntos a Daniel (nun mos paez acertada la esplicación del refrán), y un puntu a Xuacu (nun paez acertada la de retranca).

 

retranca, el/la: Dizse de la persona de físicu rabiláu, torcía. (Tu si te cases será con un/una retranca)/ 2. Rueda, persona fuerguista y de poca chapeta. (Isti anda siempre pehí de retranca)3/ En femenino , la tranca, ye una pieza de madera retorcía, de pocu o delgún valor pa emplegala na construcción.
 

abociaera, l': El fechu d'abociar. (Esto de l'abociaera dicen que ye contaxoso)

el que quiera nabos que los cabe...y el que los quiera gordos que los cabe fondos: Esti refrán, sobre too la segunda parte del mesmu, hai que la tomar dafechamente en sentíu figuráu, yá que los nabos nun fai falta enterralos muncho cuando se semen . Quier espresar que quien quiera dalgún beneficiu o provechu en daqué, tien que trabayar y esforzase lo necesario pa merecelu y non enfotase na suerte o n'ayuda de los demás.

Como nota esclaraora, decir que la pieza que se ponía nel carro del país pa poder frenalu cuando diba pa baxo peles cuestes de les caleyes, llámase la galga.