L'EDRÁU


El pueblu de L'Edráu alcuéntrase cerca del monte de la Polaúra y llégase a él subiendo pela carretera que saliendo d'El Follerón de la Caya de Perabeles pasa antes pelos barrios o sitios de Les Caecima, La Fuente'l Rebollal y El Corralón.

Esti tranquilu llugar ta despobláu dende va yá dalgunos años y tien el privilexu de ser el más altu de la parroquia de Santa Bárbola.

El nome tamién incluye, amás de les cases y cuadres,  el terreno que se topa a la mano baxo de les mesmes, agora dedicao principalmente a praos, y que presenta, na mayor parte, un suave desnivel (prácticamente llano en dellos puntos). Dalguna finca de la mano riba lleva, asinamesmo, una referencia a él, como, por exemplu, nel casu de La Payega l'Edráu.

L'orixe del topónimu hai que lu buscar, al mio mou d'entender,  nel verbu asturianu "edrar" que, según el diccionariu de l'Academia de la Llingua Asturiana,  significa "amoyonar, poner edros a una tierra". Teniendo en cuenta que la fastera de L'Edráu queda pegao al monte, ye fácil imaxinar que los nuestros antepasaos cerraran, va sieglos, aquel terreno (bono y afechisco) col fin de separalo del monte comunal de pastos que quedaba a la mano riba. Sería, por ello, designao nos primeros tiempos y conocío como EL (SITIU) EDRÁU, esto ye, el sitiu amoyonáu, fensáu y bien delimitáu.





Semeya apurrida por Audilio González González

Podemos ver más semeyes d'esta fastera pinchando nos númberos: 01