E-MAIL QUE MOS UNVIÓ MANUEL LLANEZA  EL DÍA 14 DE XINERU


4 de la tarde del 14 de xineru de 2006.
Los 7 espedicionarios encontrámosmos faciendo xornada de descansu nel campu base de "Plaza de Mulas", depués de llegar a Mendoza, como yá sabemos, y depués d'empobinamos a aclimatar al cordón de Plata na zona de Vallecitos. El tresporte de la compañía "Grajales" acercómos con tolos bártulos a la estación d'esquí ubicada nesta zona, y dexómos nel refuxu "San Bernardo" a 2.800 metros, dende onde, y depués de comer a mediu dia, subiemos al cerru "Lomas Blancas" de 3.500 m., xubida que, por cierto, mos costó bastante trabayu. Al siguiente día, y después de pasar una bona nueche, propunxémosmos algamar el cerru "San Bernardo" de 4.200.m. y consiguiémoslo con bastante menos dificultá que'l día anterior, l'aclimatación funcionaba. El siguiente oxetivu yera subir a una zona más alta, llamada "el Salto", situada a 4.200. m. onde pasemos allí 4 dis y 4 nueches. Los muleros encargáronse de subimos les coses pesaes, como tiendes, comida, etc. L'oxetivu yera que, como mui tarde, a les 12 del mediudía, tuvieran arriba, y resultó que nosotros sí tábamos, pero ellos retrasáronse hasta les 6 de la tarde. Rozada llamó-yos l'atención y reñó, y díxo-yos que pal día de recoyida, previstu pal 10 de xineru, a les 8 h. 30, nun ocurriera lo mesmo. Y funcionó, pues a les 7 de la mañana yá taben allí.
Los 4 dis nel "Salto" fueron: el primeru, d'acercamientu y acampada; el segundu, de descansu, el cual aproveché pa dar un paseu y agamiar casi los 5.000 m. (4.960.m.). Récord pa mi, que taba anteriormente nel Mont Blanc. Al siguiente día decidiemos atacar el Cerru "Plata" con 6.000 m. y consiguiémoslo los miembros yá mencionados, pero non ensin un gran esfuerzu. Lo que se describe n'artículos de revistes, llibros, cróniques, documentales, etc. ye cierto y tamién daqué más. La respiración yera insuficiente, incluso cuando descansabes, la cabeza yera una calabaza, una máquina, un non sé qué, pero toi seguru  que desde Asturies alguien me mandaba fuerces pa conseguilo. Espero que pa L'Aconcagua seya igual o meyor. Dende qui, agora mesmo vos quiero agraecer a toos l'encontu moral y la enerxía que telepáticamente mos unviáis, y que sé que trespasa, como la lluz, d'un llau al otru del gran océanu.
Continuando colo que vos taba cuntando, el siguiente día tomémoslu de descansu, pa depués, al otru, baxar al refuxu "San Berbardo", y pasar, de frente, a Penitentes, lluego de parar en "Uspallata" pa reponer víveres.
Nel hotel alcontrémosmos con los del Marca, fue Fernando Escartín el primeru que vi, saludélu y depués yá viemos a tolos demás componentes d'esi grupu. Tamos faciendo bonos amigos con ellos, son unos chavales fabulosos.
En Penitentes garremos un día de descansu pa ver Puente Inca y al siguiente dia subir a Confluencia y dar un paseu hasta casi Plaza de Francia pa ver la imponente paré sur. Los bártulos habín subíolos les mules directo hasta Plaza de Mulas, campamentu base.
Cuando regresábemos del paseu a Plaza de Francia, pa cenar, a Confluencia, topémosmos con Rosa Fernández, que yá sabíemos qu'andaba pellí,  pues Héctor había saludáola pel camín al cruzamos con ella. Fue l' únicu que la reconoció, la verdá ye que vamos mui disfrazaos pol frío y el sol.
La xornada del siguiente día fue subir a Plaza de Mulas, que dexómos fechos polvo de durísima que fue: son 1.000 metros de  desnivel con casi 20 km. de llargo, ye un tormentu baxo'l sol. Cruzar riegues y regueros tamién mos dio quebraeros de cabeza, nesta ocasión tábemos con los del Marca y fue un númeru cruzar un regueru con bastante bravura, nel que dalgunos de nosotros descalcémosmos y posemos los pantalones mientres qu'otros quixeron más pasar pente l'agua ensin quitar nada, lo que-yos valió pa garrar una bona moyaúra. A Gervasio Defer non-y costó ningún trabayu desnudase, ye un atrevíu.
La nueche del 13 a güei 14, paséla algo mal, fue'l primer día que me dolió muncho la cabeza; les otres, en algunes dolióme un poco, pero poco. Lo bono ye que tuviemos  durmiendo bien durante 10 hores (o más) nel sacu, dientro de la tienda, y vale de descansu.
Hoi tamos de bartolos ensin facer nada, pero asina descansamos pa mañana xubir yá a campamentos d'altura, y así, si mos sale bien, ser quien a llograr el cumal en 3 o 4 dis.
 
Saludos a toos y un abrazu mui fuerte a la familia. Rosi, Boniel, Alba. Munchos besos.