Cruce n'El Molín de Riba

Con nada disimulada gayola recibimos la rempuesta del vieyu amigu y veceru Esteban Carcedo Roces, que da, ensin dulda, nel clavu, al dicir que la casa de les dos semeyes anteriores ye la que s'afaya nel xerru de la fastera de Paniceres. Dende qui podemos lleelo y ver, al mesmu tiempu, les fotografíes.

Agora mangamos otra foto col enfotu de que valga pa que nuevos participantes entren na llista de la edición serondiega del concursu. ¿Ónde queda esto que vemos aquí enriba?

----------------------------------------------------------------

 

Les rempuestes que mos allegaron pa la identificación de la semeya fueron estes que trescribimos darréu:

Tomás Torre:

Esto me paez que se llama El Cantu Molín... Bueno, ye onde'l camín tira pa La Robellá y pa L'Escobal

  José Ramón González: Hola  Xulio:

                Paezme que la semeya  ta fecha n´El Molín de Riba, xusto onde se separen los caminos: un pa La Rebollá y l'utru pa L'Escobal.

Esteban Carcedo Roces: Xulio:
La semeya que punxisi nesta ocasión tengo la obligación de conocela,
pues el prau que ta a la derecha ye de la mio familia  y ta n'El Molín de
Riba y el camín que se ve va pa L'Escobal.

Luis A. Suárez:

Hola Xulio, esta foto nueva paezme que ye la senda de La Bobia a La Colladiella, nel cruce que pases pel puente pa tirar pa La Rebolla, lo que nun sé ye cómo se llama'l sitiu, a ver si lo sabe mio güela.

Ta lluego.